U Polščy raście kolkaść napadaŭ na ŭkraincaŭ
Heta źviazvajuć u tym liku z rytorykaj polskich palitykaŭ.
Akcyja da Dnia niezaležnaści Ukrainy ŭ Varšavie, 24 žniŭnia 2025 hoda. Fota: AP Photo/Czarek Sokolowski
U Polščy raście kolkaść napadaŭ na ŭkraincaŭ. U pieršaj pałovie 2026 hoda zafiksavana 180 zajaŭ pra złačynstvy na hlebie nianaviści suprać hramadzian Ukrainy — heta na 30% bolš, čym u anałahičnym pieryjadzie minułaha hoda (dla paraŭnańnia: 267 zajaŭ za ŭvieś 2024 hod i 275 za ŭvieś 2025-j). Kali tempy zachavajucca, da kanca hoda ich kolkaść moža dasiahnuć 360, piša Rzeczpospolita.
Sacyjołah Jacak Kucharčyk kaža pra «efiekt usiedazvolenaści» na fonie rytoryki niekatorych polskich palitykaŭ i rasijskaj dezinfarmacyi.
Sajuz ukraincaŭ u Polščy ŭ svaim dakładzie adznačaje, što ŭspyški antyŭkrainskich nastrojaŭ majuć chvalepadobny charaktar i pryviazany da palityčnych padziej — prezidenckaj kampanii 2025 hoda, a ŭ 2026‑m — da skandału vakoł rašeńnia Zialenskaha nazvać vajskovaje padraździaleńnie imiem UPA (u adkaz prezident Naŭrocki zabraŭ u Zialenskaha orden Biełaha arła).
Zhodna ź lipieńskim apytańniem IBRiS, 33,6% palakaŭ źmianili staŭleńnie da ŭkraincaŭ u horšy bok (u lepšy — tolki 1,8%). Bolš za pałovu apytanych (56%) vinavaciać u kryzisie Zialenskaha.