Pažar u hrodzienskaj balnicy spravakavaŭ adzin z pacyjentaŭ
Śledčy kamitet paviedamiŭ pra zaviadzieńnie kryminalnaj spravy paśla pažaru, jaki adbyŭsia ŭnačy 19 lipienia ŭ Hrodzienskim abłasnym kliničnym centry «Psichijatryja-narkałohija» na vulicy Abuchova. Taksama śledčyja raskazali pra niekatoryja padrabiaznaści hetaj spravy.
Fota: Śledčy kamitet
Pavodle źviestak śledstva, kala 3:35 uzharańnie ŭźnikła ŭ adnoj z pałat psichijatryčnaha adździaleńnia. Ratavalniki, vykarystoŭvajučy srodki abarony orhanaŭ dychańnia, evakujavali ź niebiaśpiečnaj zony šaściarych pacyjentaŭ.
Usich paciarpiełych špitalizavali ŭ reanimacyju z termičnymi apiokami cieła, dychalnych šlachoŭ, hałavy, vierchnich i nižnich kaniečnaściaŭ, a taksama z atručvańniem praduktami hareńnia. Pavodle miedykaŭ, ich stan aceńvajecca jak stabilna ciažki.
Śledstva ŭstanaviła, što asiarodak uzharańnia znachodziŭsia na adnym z balničnych łožkaŭ. Pavodle papiaredniaj infarmacyi, adzin z pacyjentaŭ pranios u pałatu krynicu adkrytaha ahniu, imavierna zapałki, i padpaliŭ matrac. U vyniku ahoń chutka raspaŭsiudziŭsia, a pamiaškańnie mocna zadymiłasia.
U dačynieńni da mužčyny Hrodzienski mižrajonny adździeł Śledčaha kamiteta ŭzbudziŭ kryminalnuju spravu pavodle č. 2 art. 218 Kryminalnaha kodeksa Biełarusi («Naŭmysnaje źniščeńnie abo paškodžańnie čužoj majomaści, učynienaje ahulnaniebiaśpiečnym sposabam»).
Čytajcie taksama:
U Hrodnie nočču hareła balnica, bolš za 250 pacyjentaŭ i piersanału evakujavali
Pad Vaŭkavyskam pierakuliłasia mašyna chutkaj dapamohi: paciarpieli miedyki i pacyjent