U akupavanym Krymie praz prablemy z mabilnaj suviaźziu viartajucca da taksafonaŭ

U akupavanym Rasijaj Krymie pačali ŭstaloŭvać vuličnyja taksafony, kab žychary mahli vyklikać ekstranyja słužby padčas adklučeńniaŭ mabilnaj suviazi. Pieršyja aparaty źjavilisia ŭ Džankoi, dzie mabilnaja suviaź ciapier pracuje pa hrafiku — dvojčy na dzień pa čatyry hadziny, piša The Moscow Times.

Fota: administracyja Jeŭpatoryi

Taksafony raźmiaścili na niekalkich haradskich vulicach. Ź ich možna biaspłatna patelefanavać pa numary 112, a taksama vyklikać pažarnuju słužbu, palicyju, chutkuju dapamohu i avaryjnuju hazavuju słužbu. Pavodle paviedamleńniaŭ miascovych uładaŭ, hetyja aparaty pracujuć navat pry adsutnaści elektryčnaści i mabilnaj sietki. Jašče adzin taksafon pastavili ŭ Jeŭpatoryi.

Apošnija tydni mnohija harady Kryma rehularna zastajucca biez elektryčnaści i vady. Rasijskija ŭłady, jakija kantralujuć paŭvostraŭ, źviazvajuć heta z udarami pa elektrapadstancyjach. Paviedamlajecca, što pakul niemahčyma skłaści stabilnyja hrafiki padačy elektraenierhii. U nasielenych punktach taksama skaracili vuličnaje aśviatleńnie i pačali dastaŭlać hienieratary tudy, dzie adklučeńni doŭžacca praciahły čas.

U Sievastopali miascovyja ŭłady pryznali, što bolš nie mohuć prytrymlivacca raniejšaha hrafika padačy elektryčnaści, a žycharam paraili sačyć za paviedamleńniami pa radyjo i zahadzia zaradžać mabilnyja telefony ŭ śpiecyjalna arhanizavanych punktach.

Maštabnyja pieraboi z elektra– i vodazabieśpiačeńniem u Krymie praciahvajucca z kanca červienia. Paśla sieryi ŭdaraŭ pa abjektach infrastruktury na paŭvostravie byŭ uviedzieny režym nadzvyčajnaj situacyi. Ataki na jaho praciahvajucca amal štodnia.

U Rasii raniej taksama prapanoŭvali adnavić sietku taksafonaŭ u suviazi z rehularnymi abmiežavańniami mabilnaj suviazi, jakija rasijskija ŭłady tłumačać mierami biaśpieki.

Kamientary da artykuła