Hrybaŭskajcie: Kali rasijanie nie źmieniacca, lepš mieć žaleznuju zasłonu
Byłaja prezidentka Litvy ŭ intervju polskamu telekanału TVP World zajaviła, što ŭ 2022 hodzie jaje najbolš ździviła «duraść Rasii», piša Delfi.lt.
Fota: Mindaugas Kulbis / AP
«U ich vielizarnaja terytoryja, jakaja im nie patrebnaja. Prosta dziela taho, kab prynizić narod i zrabić ukraincaŭ vorahami nazaŭsiody? Kab sfarmiravać va ŭkraincaŭ takuju mocnuju nacyjanalnuju samaśviadomaść, jakoj raniej nie było? Ciapier jany stanuć vorahami na stahodździ», — skazała jana.
Byłaja prezidentka taksama adznačyła, što jaje ździviła reakcyja Zachadu — nakolki bajaźlivym i napałochanym jon akazaŭsia, a taksama deficyt lidarstva.
Na pytańnie TVP World, ci źmienicca kali-niebudź Rasija, Hrybaŭskajcie adkazała, što maryć pra heta.
«Ciapier žycharam Rasii pahražaje taja ž niebiaśpieka, što i nam: ich masava kidajuć u turmy, jany nie mohuć svabodna vykazvać svajo mierkavańnie, pravy čałavieka ciapier abmiežavanyja jašče bolš, čym u časy Stalina… Ci źmienicca Rasija? Nie viedaju, ciažka pra heta razvažać… Kali jany nie zdolejuć źmianicca, dla nas budzie lepš, kali pamiž nami źjavicca žaleznaja zasłona», — padkreśliła jana.
Hrybaŭskajcke taksama spytali pra jaje sustreču z Uładzimiram Pucinym u Chielsinki ŭ 2010 hodzie. Jana raspaviała, što tady dla Litvy asabliva aktualnym było pytańnie koštaŭ na haz.
«Było zrazumieła, što havorka išła pra pasłuchmianaść i sastupki. Nam pradstavili śpis taho, što Litva pavinna zrabić. Było vidavočnaje staŭleńnie da susiednich krain: abo stanovišsia na kaleni, abo ty vorah — treciaha nie dadziena. Naturalna, ja nie mahła pryniać hetyja patrabavańni», — adznačyła byłaja prezidentka.
Pavodle jaje słoŭ, paśla toj sustrečy jana zrazumieła, što Litva pavinna pazbavicca ad enierhietyčnaj zaležnaści ad Rasii.