Žančynu z Hrodna asudzili na siem hadoŭ kałonii
Valancinu Navumavu pryznali vinavataj na 11 artykułach KK.
Apošniaje pasiadžeńnie pa spravie haradzienki Valanciny Navumavaj prajšło 24 lipienia. U vyniku sudździa Mikałaj Račynski prysudziŭ 7 hadoŭ źniavoleńnia ŭ kałonii. Mienavita stolki zapytvaŭ prakuror, piša «Haradzienskaja pravaabarona».
Navumavu pryznali vinavataj pavodle 11 artykułaŭ Kryminalnaha kodeksa:
- artykuł 16, častka 6 (pasobnictva ŭ suŭdziele ŭ złačynstvie)
- 130, častka 1 (raspalvańnie inšaj sacyjalnaj varožaści)
- 130, častka 3 (dziejańni, jakija praduhledžany častkami 1 ci 2 artykułu, ździejśnienyja hrupaj asobaŭ)
- 188 (paklop)
- 203-1, častka 3 (parušeńnie tajny pierapiski, telefonnych pieramovaŭ)
- 361-4, častki 1 i 2 (sadziejničańnie ekstremisckaj dziejnaści, tyja ž dziejańni, ździejśnienyja paŭtorna)
- 367, častka 2 (paklop u dačynieńni Łukašenki)
- 368, častka 1 (abraza Łukašenki)
- 369 (abraza pradstaŭnika ŭłady)
- 370 (ździek ź dziaržaŭnych simvałaŭ)
- 391 (źniavaha sudździ).
Valancina Navumava doŭhi čas była siabram partyi levych «Spraviadlivy śviet». U 2017 hodzie jana była aštrafavanaja na 15 bazavych adzinak pa administracyjnaj spravie za ŭdzieł u akcyi «niedarmajedaŭ».
Žančynu zatrymali 5 vieraśnia 2025 hoda i źmiaścili ŭ turmu №1 u Hrodnie. Spačatku ŭ spravie fihuravaŭ č. 2 art. 367 (paklop na Łukašenku).
Ale 27 lutaha 2026 hoda byli vystaŭlenyja novyja abvinavačvańni pavodle artykułaŭ Kryminalnaha kodeksa.