22‑hadovy Viktar z-pad Klecka pratrymaŭsia na froncie miesiac. A paśla baćki pierasvarylisia, dzielačy hrabavyja
Ad cieła chłopca, jaki pryjšoŭ «vyzvalać» Danieckuju vobłaść, amal ničoha nie zastałosia, brali DNK z pareštkaŭ. A paśla baćki stali vyśviatlać, chto ź ich piŭ, a chto hadavaŭ dzicia.
Viktar Cynkievič. Fota: Vk.com
Viktar Cynkievič naradziŭsia 9 listapada 2002 hoda ŭ Zaastravieččy pad Kleckam — ciapier heta niemały ahraharadok amal na 2000 čałaviek. Adtul da vajny, što zabrała jaho žyćcio, tysiača kiłamietraŭ i cełaja epocha. Ale ŭ Zaastravieččy chłopiec amal nie pažyŭ. Baćka Pavieł Cynkievič byŭ vajskoŭcam, i siamja pierabrałasia ŭ Rasiju, u Enhiels Sarataŭskaj vobłaści. Dalej usio žyćcio Viktara budzie ruchacca pa karcie — tudy, kudy pasyłali słužyć baćku.
Siamja razvaliłasia, kali chłopčyku było hadoŭ z vosiem. Heta 2010 hod. Što mienavita tady adbyłosia, baćki praź piatnaccać hadoŭ u sudzie buduć raskazvać pa-roznamu: maci Taćciana śćviardžała, što baćka piŭ i vyhnaŭ jaje z domu, baćka — što piła i viała razhulny ład žyćcia jakraz jana, kinuła jaho z synam i bolš nie viarnułasia.
Sud u vyniku pavieryŭ baćku. Jak by tam ni było, z taho času maci źnikła z žyćcia Viktara. Kali jamu było dziesiać, na sudzie ab miescy žycharstva jon skazaŭ prosta: mamu nie bačyŭ užo hady z dva, apošni raz — mimachodź, z akna mašyny, kali prajazdžaŭ mima. Z dniom naradžeńnia jana jaho nie vinšuje.
Hadavaŭ jaho baćka. I mačacha — žančyna, jakuju Viktar nazyvaŭ mamaj i jakaja, pavodle jaje ŭłasnych słoŭ u sudzie, pryśviaciła jamu žyćcio, svaich dziaciej nie zajmieŭšy.
Z raźvićciom u Viktara byli prablemy — u 2011‑m jaho ŭziali tolki ŭ enhielskuju śpiecyjalnuju karekcyjnuju škołu. Potym była jašče adna škoła, a kali baćku pieraviali słužyć na Daloki Uschod, Viktar dakančvaŭ dzieviać kłasaŭ užo ŭ pasiołku Sieryšava Amurskaj vobłaści. Paśla pastupiŭ u Amurski ahrarny kaledž — vučyŭsia na mašynista darožnych i budaŭničych mašyn.
Viktar Cynkievič. Fota: Vk.com
2 červienia 2023 hoda, u dvaccać hadoŭ, Cynkievič padpisaŭ kantrakt ź Ministerstvam abarony. Słužyŭ u Kamsamolsku-na-Amury, potym pad Maskvoj. Na front, u zonu tak zvanaj SVA, trapiŭ tolki 27 studzienia 2025 hoda. Uziaŭ sabie pazyŭny «Filin».
Na vajnie jon pratrymaŭsia tolki miesiac. 3 sakavika 2025 hoda Viktar prapaŭ bieź viestak. 6 sakavika zahinuŭ — kala nasielenaha punkta Leanidaŭka ŭ Dziaržynskim rajonie «DNR». U daviedcy ab śmierci sucha napisana pryčyna: vostraja masiŭnaja strata kryvi, množnyja traŭmy, vybuch padčas bajavych dziejańniaŭ. Cieła amal nie zastałosia — asobu vyznačyli tolki ŭ listapadzie, praz paŭhoda, pa supadzieńni DNK.
Usie hetyja miesiacy, pakul išoŭ pošuk, pakul źviartalisia ŭ vajskovuju čaść i ŭ apaznavalnaje viedamstva, usim zajmałasia mačacha — taja samaja žančyna, jakuju jon klikaŭ mamaj. Bijałahičnaja maci na suviaź z čaściu nie vychodziła.
A potym pačalisia sudovyja razborki. Za zahinułaha na vajnie kantraktnika dziaržava płacić vialikija hrošy, zvyčajna bolš za $100 tysiač. I baćka padaŭ u sud, kab byłuju žonku pazbavili prava na hetyja hrošy: maŭlaŭ, jana nie raściła syna, nie maje maralnaha prava atrymlivać za jaho kampiensacyju.
Maci abaraniałasia jak mahła. Pisała, što tajkom sustrakałasia z synam u enhielskim parku imia Kasila, kuplała jamu marožanaje i cukierki, što jon raiŭsia ź joj nakont vučoby, što apošni raz jany pierapisvalisia ŭ WhatsApp. Ale jaje ŭspaminy błytalisia — jana pierabłytała škoły, u jakich jon vučyŭsia, i daty. Pierapisku sud adchiliŭ: pavodle dakumientaŭ, u toj dzień, kali «syn» nibyta pisaŭ joj, što jon na vajnie, Viktar jašče i blizka nie byŭ na froncie.
Dačku Alonu — Viktaravu zvodnuju siastru ad inšaha mužčyny — žančyna ŭ svoj čas taksama pakinuła, tuju vyhadavała ŭ Biełarusi babula.
16 krasavika 2026 hoda Enhielski rajonny sud zadavoliŭ isk baćki. Maci Viktara pazbavili prava na ŭsie vypłaty za hibiel syna — da apošniaj kapiejki.
Chłopiec zastaŭsia ŭ dakumientach dvojčy: spačatku — radkom u daviedcy ab śmierci, potym — pradmietam sprečki pamiž baćkami, jakija dzialili hrošy, što Rasija dała za jaho hibiel.
Viktar Cynkievič. Fota: Vk.com