Ukraincy nanieśli ŭdar pa rasijskich abjektach u Kaśpijskim mory

Prezident Ukrainy Uładzimir Zialenski zajaviŭ, što ŭkrainskija siły nanieśli dalokija ŭdary pa abjektach u akvatoryi Kaśpijskaha mora. Pavodle jaho słoŭ, USU parazili sudny, jakija vykarystoŭvalisia dla pieravozki vajskovych hruzaŭ ź Irana ŭ Rasiju, a taksama rasijski vajskovy karabiel. Pra heta jon paviedamiŭ u svaim telehram-kanale, adznačyŭšy, što vyniki apieracyi byli vielmi paśpiachovymi.

Naftazdabyŭnaja płatforma «Fiłanoŭskaha» ŭ Kaśpijskim mory. Fota ilustracyjnaje

Taksama Zialenski paviedamiŭ, što ŭ noč na 25 lipienia Siły abarony Ukrainy nanieśli ŭdary pa šerahu abjektaŭ, źviazanych z materyjalna-techničnym zabieśpiačeńniem rasijskaj armii. Pavodle jaho infarmacyi, pad udar trapili naftapierapracoŭčy zavod u Ciumieni, łahistyčny abjekt kampanii Wildberries u Jekaciarynburhu, a taksama skład paliŭna-zmazačnych materyjałaŭ u Rastovie-na-Donie.

Akramia taho, ukrainski prezident paćvierdziŭ paražeńnie pradpryjemstva ŭ Kiravie, dzie vyrablajucca kamplektujučyja dla ŭzbrajeńnia, jakoje Rasija vykarystoŭvaje ŭ bajavych dziejańniach suprać Ukrainy. Jon adznačyŭ, što hety abjekt znachodzicca prykładna za 1200 kiłamietraŭ ad dziaržaŭnaj miažy Ukrainy.

Słužba biaśpieki Ukrainy paviedamiła dadatkovyja padrabiaznaści pra apieracyi ŭ Kaśpijskim mory. Pavodle infarmacyi viedamstva, bieśpiłotniki atakavali naftazdabyŭnuju płatformu na radoviščy «Fiłanoŭskaha», hruzavyja sudny, jakija znachodziacca pad mižnarodnymi sankcyjami i vykarystoŭvalisia dla pieravozki vajskovych hruzaŭ pamiž Iranam i Rasijaj, a taksama rakietny katar prajekta 12418 «Małanka».

U SBU zajavili, što hetyja dziejańni stali adkazam na rasijskija ŭdary pa ŭkrainskich partach na poŭdni krainy i sproby pieraškadžać ukrainskamu sudnachodstvu. U viedamstvie padkreślili, što takija apieracyi pravodziacca ŭ ramkach prava Ukrainy na samaabaronu i buduć praciahvacca ŭ adkaz na dziejańni Rasii.

Kamientary da artykuła