Bujny i prestyžny Zalcburhski fiestyval adkryje pramovaj Maryja Kaleśnikava
Arkiestram na adkryćci budzie kiravać biełaruski dyryžor Vital Aleksiajonak, piša DW.
Maryja Kaleśnikava ŭ Aachienie na ŭručeńni Mižnarodnaj premii imieni Karła Vialikaha
U aŭstryjskim Zalcburhu ŭ niadzielu, 26 lipienia, projdzie aficyjnaja cyrymonija adkryćcia Zalcburhskaha fiestyvalu — adnaho z najbujniejšych suśvietnych forumaŭ kłasičnaj muzyki i teatra.
Tradycyjnaja ŭračystaja pramova štohod adkryvaje fiestyval i zadaje ton jaho hramadskaj dyskusii. Sioleta arhanizatary zaprasili vystupić na adkryćci Maryju Kaleśnikavu — adnu ź lidarak pratestaŭ u Biełarusi 2020 hoda. Prafiesijnaja flejtystka i dyryžorka, Kaleśnikava źjaŭlajecca hanarovaj prafiesarkaj univiersiteta Macarteum u Zalcburhu i ŭładalnicaj Mižnarodnaj premii Karła Vialikaha.
«Maryja Kaleśnikava — dokaz taho, što mienavita mastactva daje ludziam mužnaść i aporu ŭ žyćci. Mova muzyki i paezii zaŭsiody macniejšaja za hvałt, tyraniju i samaŭpraŭstva», — cytuje sajt fiestyvalu słovy intendantki Karyn Bierhman.
Muzyčnuju prahramu cyrymonii adkryćcia ŭznačalić biełaruski dyryžor Vital Aleksiajonak. Jon budzie dyryžavać arkiestram Macarteuma Zalcburha. Paśla prezidenckich vybaraŭ 2020 hoda ŭ Biełarusi dyryžor adkryta vystupiŭ suprać režymu Alaksandra Łukašenki i paźniej apisaŭ padziei taho času ŭ knizie «Biełyja dni Minska. Naša mara pra svabodnuju Biełaruś». Ciapier Aleksiajonak — hałoŭny dyryžor Niamieckaj opiery na Rejnie ŭ Dziusieldorfie i Dujsburhu.