Wildberries pačaŭ šukać składskija pamiaškańni ŭ Kazachstanie praz ataki ŭkrainskich bieśpiłotnikaŭ
Najbujniejšy rasijski markietpłejs Wildberries pačaŭ pošuk składskich pamiaškańniaŭ u Kazachstanie paśla sieryi ŭkrainskich udaraŭ pa łahistyčnych centrach na terytoryi Rasii, paviedamili haziecie «Kommiersant» čatyry krynicy na rynku nieruchomaści.
Pažar na składzie ŭ Elektrastali. Fota: bereg.io
Pavodle słoŭ adnaho z surazmoŭcaŭ, kampanija šukaje pamiaškańni ahulnaj płoščaj kala 100 tysiač kvadratnych mietraŭ. Inšaja krynica adznačyła, što Wildberries hatovy arandavać usie dastupnyja składskija płoščy ŭ Kazachstanie. Takim čynam markietpłejs raźličvaje abaranić častku svaich łahistyčnych mahutnaściaŭ ad atak ukrainskich bieśpiłotnikaŭ, rastłumačyli surazmoŭcy «Kommiersanta».
Pry hetym znajści adpaviednyja abjekty ŭ Kazachstanie moža być niaprosta. Pavodle danych NF Group, na kaniec 2025 hoda ŭ krainie naličvałasia 1,9 młn kvadratnych mietraŭ jakasnych łahistyčnych płoščaŭ, ale svabodnymi zastavalisia tolki 5,8 %.
Kirujučy partnior IBC Global Stanisłaŭ Achmiedzianaŭ adznačyŭ, što adzinaha składskoha kompleksu płoščaj 100 tysiač kvadratnych mietraŭ na kazachstanskim rynku niama. Na kaniec červienia 2026 hoda svabodnymi ličylisia ŭsiaho 130 tysiač kvadratnych mietraŭ, raźmieščanych u roznych haradach krainy.