Tusk prakamientavaŭ źbićcio ŭkrainskaj pary va Urocłavie i zaklikaŭ prezidenta «pierastać maŭčać»
«Bandyty nabyli śmiełaść». Donald Tusk abvinavaciŭ pravych palitykaŭ u zastupnictvie hvałtu paśla napadzieńnia na ŭkraincaŭ va Urocłavie.
Donald Tusk. Fota: Photo by Didier Lebrun / Photonews via Getty Images
Premjer-ministr Polščy Donald Tusk prakamientavaŭ źbićcio ŭkrainskaj pary va Urocłavie. Kiraŭnik polskaha ŭrada źviarnuŭsia da prezidenta krainy Karala Naŭrockaha z patrabavańniem adreahavać na toje, što adbyvajecca: «Ja napramuju źviartajusia da prezidenta z prośbaj pierastać maŭčać pa hetym pytańni».
Jon nahadaŭ, što raniej Naŭrocki nazyvaŭ futbolnyja bojki «vysakarodnaj rukapašnaj baraćboj», i dadaŭ: «Chaj ciapier pahladzić, jak vyhladaje heta «vysakarodnaja baraćba».
Pavodle polskaha premjera, ahresiŭnyja hrupoŭki adčuli biespakaranaść praz zastupnictva z boku palitykaŭ.
«Bandyty, futbolnyja chulihany — heta patałohija hvałtu — nabyli śmiełaść i biespakaranaść, tamu što atrymali palityčnaje zastupnictva», — skazaŭ Tusk.
Źviarnuŭsia jon i da lidara partyi «Prava i spraviadlivaść» Jarasłava Kačyńskaha. «Ja źviartajusia da spadara Kačyńskaha z prośbaj pierastać zaklikać da stvareńnia bajcoŭskich atradaŭ, jak jon zrabiŭ niadaŭna, tamu što jamu nie padabajecca palicyja. Palicyja atrymaje maju poŭnuju padtrymku ŭ baraćbie z bandytyzmam i hvałtam».
Kiraŭnik polskaha ŭrada pierakanany, što takija napady škodziać samoj Polščy. «Vy dziejničajecie suprać Polščy i ŭ intaresach Rasii, u intaresach nacyjanalizmu. Polskaha i ŭkrainskaha. Niama słoŭ», — skazaŭ jon.
Tusk zaklikaŭ suhramadzian nie zastavacca abyjakavymi i paviedamlać pravaachoŭnikam pra padobnyja fakty ahresii.