Lasnyja pažary razbušavalisia na Krycie: tam evakujavali tysiačy čałaviek
Haryć i ŭ inšych miescach Hrecyi.
Fota: Giannis Angelakis / AP
Tysiačy ludziej byli evakujavanyja z hreckaha vostrava Kryt — lasnyja pažary, jakija raspalvaje mocny viecier, pahražajuć turystyčnym kurortam i vioskam, piša Bi-bi-si.
Na praciahu nočy kala 8 tysiač čałaviek byli evakujavanyja z Recimna ŭ zachodniaj častcy vostrava, tam paryvy vietru dasiahali 125 km/h.
Sinoptyki papiaredžvajuć, što ŭžo na hetym tydni ŭmovy, jakija spryjajuć uźniknieńniu pažaraŭ, raspaŭsiudziacca ŭ bok Centralnaj Jeŭropy, pryčym Hrecyja i Turcyja buduć siarod najbolš paciarpiełych rehijonaŭ.
Pažar, jaki ciapier bušuje ŭ Recimna, uspychnuŭ u sieradu i, jak miarkujecca, užo źniščyŭ šerah damoŭ i sielskahaspadarčych uhodździaŭ.
Heta adzin z najbujniejšych pažaraŭ, jakija ciapier achapili vostraŭ: praciahłaść jaho frontu pieravyšaje 15 kiłamietraŭ, a ahoń zastajecca niekantralavanym.
Pavodle słoŭ namieśnicy rehijanalnaha hubiernatara Recimna Maryi Lijoni, dakładnaha ŭjaŭleńnia pra maštaby razbureńniaŭ pakul niama. Jana dadała, što pažar usio jašče praciahvajecca, a jaho łakalizacyja zastajecca hałoŭnym pryjarytetam.
Pavodle jaje słoŭ, unačy paryvy vietru dasiahali 11 bałaŭ pa škale Baforta [11 bałaŭ kłasifikujecca jak mocny štorm, maksimalny viecier — 12 bałaŭ, heta ŭrahan — NN].
Niahledziačy na namahańni pažarnych, mocny viecier raznosić połymia i istotna ŭskładniaje tušeńnie pažaru. U čaćvier ranicaj pažarnyja samaloty nie zmahli ŭźniacca ŭ pavietra praź niespryjalnyja ŭmovy nadvorja.
Častku evakujavanych z Recimna pieravieźli ŭ časovy prytułak u susiednim municypalitecie, paviedamiła Lijoni. Jana taksama adznačyła, što dla turystaŭ arhanizavali ŭsiu nieabchodnuju dapamohu.
Lasnyja pažary ŭźnikli i ŭ inšych rehijonach Hrecyi — na astravach Parks i Lesbas u Ehiejskim mory, a taksama ŭ horadzie Tryfilija na poŭdni macierykovaj častki krainy.
Pavodle źviestak pažarnaj słužby Hrecyi, u baraćbie sa stychijaj zadziejničany bolš za 220 pažarnych, 53 pažarnyja mašyny, 11 śpiecyjalizavanych padraździaleńniaŭ i dva samaloty.