Biełaruski biznes-partnior Hahika Carukiana źbirajecca padać inviestycyjny pazoŭ suprać Armienii

Biznesmien Mikałaj Vinicki, jaki maje hramadzianstva Biełarusi i Rasii, paviedamiŭ uładam Armienii pra namier źviarnucca ŭ mižnarodny inviestycyjny arbitraž. Jon śćviardžaje, što armianskija ŭłady parušyli jaho pravy jak inviestara i nanieśli škodu jaho ekanamičnym intaresam, piša Reform.news.

Fota: news.am

Pavodle paviedamleńnia pres-sakratarki apazicyjnaj partyi «Kvitniejučaja Armienija» Iviety Tanajan, 27 lipienia Vinicki nakiravaŭ armianskamu ŭradu aficyjnaje paviedamleńnie ab uźniknieńni inviestycyjnaj sprečki. Jano hruntujecca na pahadnieńniach ab uzajemnaj abaronie inviestycyj pamiž Armienijaj i Biełaruśsiu, Armienijaj i Rasijaj, a taksama na pałažeńniach Damovy ab Jeŭrazijskim ekanamičnym sajuzie. Praz dva dni armianski bok paćvierdziŭ atrymańnie dakumienta.

Biznesmien śćviardžaje, što jahonyja pravy byli parušanyja ŭ suviazi z padziejami vakoł čatyroch armianskich pradpryjemstvaŭ: Araratcement, Multi Group Concern, Multi Welness Center i Jerevanskaha kańjačna-vinaharełačnaha zavoda «Ararat». Pavodle jaho słoŭ, dziejańni armianskich uładaŭ pryviali da faktyčnaj eksprapryjacyi inviestycyj, a taksama istotna ŭskładnili kiravańnie i dziejnaść hetych kampanij.

U svajoj zajavie Vinicki śćviardžaje, što pačynajučy ź pieryjadu pierad parłamienckimi vybarami ŭ Armienii ŭ červieni 2026 hoda i paśla ich dziaržaŭnyja orhany prymali nieabhruntavanyja, advolnyja i dyskryminacyjnyja miery palityčnaha charaktaru, jakija parušyli mižnarodnyja harantyi abarony inviestycyj.

Jon taksama zajaviŭ, što jaho dziełavy partnior, staršynia partyi «Kvitniejučaja Armienija» Hahik Carukian, a taksama kiraŭniki šerahu pradpryjemstvaŭ byli aryštavanyja, što, na jaho dumku, faktyčna paralizavała pracu hetych kampanij.

Vinicki zaklikaŭ armianskija ŭłady admovicca ad dalejšaha ŭmiašańnia ŭ dziejnaść pradpryjemstvaŭ, viarnuć kantrol nad imi zakonnym akcyjanieram i zabiaśpiečyć mahčymaść narmalnaj pracy bieź dziaržaŭnaha cisku.

Kali bakam nie ŭdasca ŭrehulavać sprečku šlacham pieramoŭ, biznesmien maje namier raspačać mižnarodny inviestycyjny arbitraž i patrabavać kampiensacyi naniesienaj škody. Pavodle jaho słoŭ, heta moža stać adnoj ź pieršych spraŭ, u jakoj suprać Armienii buduć vykarystanyja miechanizmy abarony inviestycyj, praduhledžanyja Damovaj ab Jeŭrazijskim ekanamičnym sajuzie.

Hahik Carukian viadomy svaimi blizkimi kantaktami z Alaksandram Łukašenkam. Jon nieadnarazova nazyvaŭ jaho svaim siabram. Pasolstva Biełarusi ŭ Armienii znachodzicca pobač z rezidencyjaj Carukiana ŭ siale Aryndž kala Jerevana. U 2024 hodzie hetaha dziejača naviedvaŭ staršynia Nacyjanalnaha alimpijskaha kamiteta Biełarusi Viktar Łukašenka, a ŭ 2025 hodzie pry sadziejničańni Carukiana była vyzvalenaja zatrymanaja ŭ Biełarusi armianskaja błohierka Beła (Roza Babachanian).

Kamientary da artykuła