Tramp pastaviŭ pad sumnieŭ pieradaču Ukrainie licenzii na rakiety dla Patriot
Hetuju temu Tramp i Zialenski abmiarkoŭvali padčas sustrečy ŭ Vašynhtonie ŭ aŭtorak
Donald Tramp. Fota: Andrew Harnik/Getty Images
Prezident ZŠA Donald Tramp u telefonnym intervju Financial Times u čaćvier zajaviŭ, što «nie ŭpeŭnieny», ci dazvolić jon Ukrainie vyrablać rakiety dla zienitnych sistem Patriot. «My razhladajem hetaje pytańnie», — piša Bi-bi-si.
Abiacańnie pradastavić licenziju na vytvorčaść rakiet dla Patriot prahučała ŭ pačatku lipienia padčas sustrečy Trampa z prezidentam Ukrainy Uładzimiram Zialenskim na palach samitu NATA ŭ Turcyi.
Hetuju temu Tramp i Zialenski abmiarkoŭvali i padčas sustrečy ŭ Vašynhtonie ŭ aŭtorak, paviedamlaŭ ukrainski prezident, dla jakoha bojeprypasy da Patriot majuć krytyčnaje značeńnie i nieabchodnyja dla adbićcia pačaščanych rasijskich udaraŭ balistyčnymi rakietami.
«Heta sapraŭdy vyklučnaja zbroja, i nam treba być krychu bolš aściarožnymi ŭ tym, kamu my vydajom licenzii. Nasamreč my nie vydajom licenzij na takoje abstalavańnie», — skazaŭ Tramp u intervju Financial Times.
Zialenski nazvaŭ apošniuju sustreču z prezidentam ZŠA «dobraj» i paviedamiŭ, što jany abmierkavali «vytvorčaść zienitnych rakiet Patriot i niekalki inšych idej». Pavodle słoŭ prezidenta Ukrainy, Tramp «pryniaŭ prapanovu ab pradastaŭleńni nam licenzij».
Sistemy Patriot majuć žyćciova važnaje značeńnie dla pierachopu rasijskich balistyčnych rakiet, jakija nakiroŭvajucca na Kijeŭ i inšyja harady. Tamu pierakanać Trampa razhledzieć mahčymaść dazvolić Kijevu vyrablać hetyja rakiety stała značnym dasiahnieńniem dla Zialenskaha, adznačaje vydańnie.
Tramp taksama paviedamiŭ Financial Times, što jaho śpiecyjalnyja pasłańniki Styŭ Uitkaf i Džared Kušnier naviedajuć Ukrainu ŭ najbližejšyja dni, paćvierdziŭšy infarmacyju krynic vydańnia. Heta budzie ich pieršy vizit u Kijeŭ paśla niekalkich sustreč z rasijskim prezidentam Uładzimiram Pucinym u Maskvie.
«Kali kazać prosta, my chočam, kab vajna va Ukrainie z Rasijaj skončyłasia, — skazaŭ amierykanski prezident. — Mnie nie patrebnyja rakiety. Nam patrebny mir».