U centry Varšavy palak napaŭ na biełarusku paśla taho, jak pačuŭ jaje akcent
Jon pačuŭ akcent i pačaŭ vykrykvać univiersalnyja abrazy: «Spi***dalaj do Ukrainy».
Skrynšot videa
Kala Rondo ONZ u centry Varšavy adbyłosia napadzieńnie na dziaŭčynu ź Biełarusi, piša «Realnaja Varšava».
Pavodle słoŭ paciarpiełaj, padčas telefonnaj razmovy nieznajomy mužčyna kryknuŭ joj: «Adydzi, karova». Spačatku jana nie zrazumieła, što źviartajucca mienavita da jaje. Kali dziaŭčyna sastupiła darohu i pa-polsku skazała, što nie zrazumieła, što mužčyna źviartaŭsia da jaje takim čynam, jon pačuŭ akcent i pačaŭ vykrykvać univiersalnyja abrazy: «Spi***dalaj do Ukrainy».
Dziaŭčyna dastała telefon i adkazała, što jana biełaruska. Paśla hetaha mužčyna nazvaŭ jaje «ruskaj šmataj», padbieh i ŭdaryŭ pa tvary. U hety momant zapis abarvaŭsia.
Paciarpiełaja vyklikała palicyju, sprabavała dahnać napadnika i prasiła minakoŭ dapamahčy jaho zatrymać, ale nichto nie ŭmiašaŭsia, i mužčyna źbieh.
Dziaŭčyna padała zajavu ŭ palicyju i pieradała videazapis, na jakim dobra bačny tvar napadnika. Pavodle jaje słoŭ, z momantu zvarotu jana pakul nie atrymała nijakaj infarmacyi pra chod rasśledavańnia.