U centry Maskvy niešta ŭzarvałasia ŭ elitnym restaranie — troje zahinułych

Uviečary 1 žniŭnia ŭ restaracyi Balzi Rossi na Kudrynskaj płoščy ŭ centry Maskvy adbyŭsia vybuch. Pavodle papiaredniaj infarmacyi, zahinuli try čałavieki, jašče kala 20 atrymali traŭmy, piša The Moscow Times.

Zdymak ilustracyjny. Fota: restoclub.ru 

Na momant zdareńnia ŭ restaranie prachodziła viasielle, u jakim udzielničali kala 50 čałaviek. Dla inšych naviedvalnikaŭ ustanova była zakrytaja. Siarod paciarpiełych jość i supracoŭniki restaracyi.

Na miesca zdareńnia prybyli pažarniki, ratavalniki i miedyki. Paranienych evakujujuć na nasiłkach i dastaŭlajuć u balnicy mašynami chutkaj dapamohi.

Pryčyny vybuchu pakul vyśviatlajucca. Pavodle adnoj ź viersij, mahło adbycca ŭzharańnie i vybuch hazavaha abstalavańnia na kuchni. Pavodle inšaj — vybuch adbyŭsia ŭ haściavoj zale restarana. Aficyjnaha paćviardžeńnia pryčyn pakul niama.

Krynica vydańnia Astra paviedamiła, što ŭ restaranie, dzie adbyŭsia vybuch, mahli adznačać dzień naradžeńnia niejkaha hienierała.

Pavodle jaje słoŭ, kala restarana nibyta było pryparkavana šmat aŭtamabilaŭ z čornymi dziaržaŭnymi numarami. Takija numarnyja znaki zvyčajna vykarystoŭvajucca na transparcie Uzbrojenych sił Rasii, a taksama šerahu inšych siłavych viedamstvaŭ. Akramia taho, pobač z restaranam znachodziŭsia aŭtobus Rashvardyi. Paćviardžeńniaŭ hetaj infarmacyi, adnak, pakul niama.

U suviazi z nadzvyčajnym zdareńniem maskoŭskija ŭłady pierakryli ruch na ŭčastku ad stancyi mietro «Barykadnaja» da Navinskaha bulvara. Taksama byŭ admienieny načny viełafiestyval, a jaho ŭdzielnikaŭ evakujavali z Sadovaha kalca.

Kamientary da artykuła