Domračava raskazała, čamu nie płanuje pracavać trenieram u Biełarusi
Čym ciapier žyvie čatyrochrazovaja alimpijskaja čempijonka pa bijatłonie Darja Domračava i ci nie płanuje pačynać trenierskuju karjeru ŭ Biełarusi, «Točka» spytała spartsmienku, jakoj siońnia spoŭniłasia 40 hadoŭ.
Darja Domračava. Fota: dadofun / Instagram
Siamja Domračavaj zaraz žyvie na try krainy: Biełaruś, Narviehija i Manaka. Kniastva — heta vybar muža spartsmienki — znakamitaha narviežskaha bijatłanista Ule-Ejnar Bjorndalena, 8‑razovaha alimpijskaha čempijona. Tam kamfortna, biaśpiečna, nichto nie źviartaje ŭvahi na znakamitaściaŭ. Sužencam časam chočacca cišyni i spakoju.
Na pytańnie pra mahčymuju trenierskuju karjeru na radzimie Domračava adkazała admoŭna, chacia razam z mužam bolš za dva hady jana treniravała kitajskich bijatłanistaŭ.
«Trenierskaja praca vielmi cikavaja, ale jana patrabuje poŭnaj addanaści i pryśviačeńnia praktyčna ŭsiaho svajho času pracesu», — tłumačyć spartsmienka.
A padrastajučyja dzieci patrabujuć šmat uvahi. Pavodle słoŭ Domračavaj, heta zaraz dla jaje hałoŭnaje.
U sužencaŭ dźvie dački — 9‑hadovaja Ksienija i trochhadovaja Mira.
Jak kaža Darja, u Ksienii šmat zachapleńniaŭ, sport taksama prysutničaje.
«Zusim nie abaviazkova, što Ksienija źviaža svajo žyćcio ź bijatłonam i naohuł sa sportam. Hałoŭnaje, kab joj padabałasia toje, čym zajmajecca», — kaža Domračava.