Jakija lhoty straciać žychary Homiela praz vyvad horada z čarnobylskaj zony
Charčavańnie, sanatoryi, dekretny adpačynak — stračanyja lhoty zhadvaje «Fłahštok».
Homiel vyklučyli ź pieraliku nasielenych punktaŭ, jakija znachodziacca ŭ zonach radyjeaktyŭnaha zabrudžvańnia. Adpaviednuju pastanovu ŭrada Biełarusi padpisaŭ premjer-ministr Alaksandr Turčyn, paviedamiŭ 3 žniŭnia Saviet ministraŭ.
Paśla abnaŭleńnia pieraliku nasielenych punktaŭ i abjektaŭ, jakija znachodziacca ŭ zonach radyjeaktyŭnaha zabrudžvańnia, «čystymi», akramia Homiela, stali taksama Lelčycy, Łuniniec, Iŭje i jašče 173 nasielenyja punkty.
Saviet ministraŭ pastanaviŭ ličyć, što bolš za 566 tysiač čałaviek adhetul žyvuć nie ŭ zabrudžanaj zonie.
Paśla abnaŭleńnia pieraliku ŭ zonach radyjeaktyŭnaha zabrudžvańnia zastalisia 1845 nasielenych punktaŭ (-177), u jakich pražyvaje 364,2 tys. čałaviek (-566,4), i 33 abjekty (-16).
U krasaviku 2025 hoda Alaksandr Łukašenka zadaŭsia pytańniem:
«Čym ža my tady zajmalisia 30 hadoŭ, kali ŭ nas 900 tysiač pražyvajuć na zabrudžanych terytoryjach? (…) Čaho vy dahetul nazyvajecie ličby, jakija byli 40 hadoŭ tamu? Treba pryvodzić (jak by heta ni było papularna ci niepapularna) u adpaviednaść [z rečaisnaściu]».
Z hetaha moža vynikać, što ŭrad rychtavaŭ pastanovu pa patrabavańni Łukašenki. Adnak prama pra heta nie havorycca.
U apublikavanaj aficyjnaj infarmacyi śćviardžajecca, što analiz vynikaŭ praviedzienaj u 2021‑2025 hadach Minpryrody i Minzdaroŭja pracy pa abśledavańni zabrudžanych terytoryj z adboram prob hleby i acency dozavych nahruzak na nasielnictva pakazaŭ «značnaje palapšeńnie abstanoŭki ŭ asobnych nasielenych punktach na zabrudžanych radyjenuklidami terytoryjach».
I adznačajecca, što pa ŭzhadnieńni z Łukašenkam ustupleńnie ŭ siłu pastanovy praduhledžvajecca z 1 studzienia 2027 hoda, a ilhoty na biaspłatnaje charčavańnie zachoŭvajucca da červienia 2027 hoda dla niepaŭnaletnich dziaciej, jakija pražyvajuć i (abo) navučajucca va ŭstanovach adukacyi, raźmieščanych na terytoryjach, što vyvodziacca z katehoryi zabrudžanych.
Takim čynam, charčavańnie ŭ škołach budzie biaspłatnym dla hamialčan jašče na praciahu nastupnaha navučalnaha hoda. A pra astatnija ilhoty «čarnobylcaŭ» u infarmacyi ŭrada ničoha nie skazana. Značyć, hetyja ilhoty pierastanuć dziejničać užo z 1 studzienia 2027 hoda, paśla ŭstupleńnia pastanovy ŭ siłu.
Jakija jašče straty samyja adčuvalnyja dla hamialčan, akramia biaspłatnaha charčavańnia školnikaŭ i 50‑pracentnaj apłaty za charčavańnie ŭ dziciačych sadkach?
Heta ilhotnaje sanatorna-kurortnaje lačeńnie, pieršačarhovaje pradastaŭleńnie miescaŭ u internatach dla studentaŭ z Homiela, pieravažnaje prava na zaličeńnie va ŭstanovy adukacyi.
Taksama ciažarnyja žančyny pierastanuć mieć prava na adpačynak pa ciažarnaści i rodach z 27‑ha tydnia praciahłaściu 146 kalandarnych dzion. Dla ich buduć dziejničać ahulnyja praviły zakanadaŭstva.
Novyja paśviedčańni paciarpiełaha ad nastupstvaŭ katastrofy na ČAES pa padstavie pražyvańnia ŭ Homieli bolš afarmlacca nie buduć. Ale da 1 studzienia, vierahodna, jašče možna paśpieć atrymać čarnobylskaje paśviedčańnie.