«Dakazvała, što ja — heta ja». Biełaruska zakazała BADy ŭ ZŠA — i daviedałasia, što pavinna polskaj dziaržavie bolš za 5 miljonaŭ dalaraŭ

Adkryŭšy list ad polskaj padatkovaj słužby, Taćciana ledź nie straciła prytomnaść. Jana musić zapłacić polskaj dziaržavie 20 miljonaŭ złotych (kala 5,3 miljona dalaraŭ). Adkul takaja suma? Žančyna pačała raźbiracca — i vyśvietliła, što «doŭh» atrymaŭsia praz šerah supadzieńniaŭ. A pačałosia ŭsio z BADaŭ dla supakojvańnia, jakija biełaruska zakazała ŭ ZŠA. Taćciana raskazała vydańniu Most, jak dva miesiacy dakazvała dziaržaŭnamu orhanu, što jana — heta jana.

Zdymak ilustracyjny. Fota: magnific.com

Napačatku leta Taćciana viarnułasia z Varšavy ŭ Ščecin, dzie ciapier žyvie, i znajšła ŭ paštovaj skryncy paviedamleńnie, što jaje čakaje zakazny list. Praŭda, imia jaje było napisana niedakładna — Taćciana Piatroŭskaja — jak u dziavoctvie. Paśla šlubu žančyna ŭziała padvojnaje proźvišča, dadaŭšy častku Skapcova. Adnak takaja niedakładnaść jaje nie ździviła: siabry časta apuskajuć hetu častku.

Taćciana pajšła na poštu, atrymała list i adkryła jaho prosta ŭ adździaleńni. Pačała čytać — i joj stała drenna. Padatkova-mytnaja administracyja paviedamlała, što jana, Taćciana Piatroŭskaja, znachodzicca ŭ sankcyjnym śpisie Respubliki Polšča za akt ahresii suprać Ukrainy. I pavinna Polščy 20 miljonaŭ złotych.

List byŭ aficyjny. Viersiju pra toje, što heta niejkija machlary, pryjšłosia adkinuć.

«Sistema abjadnała nas u adnaho čałavieka»

Biełaruska pačała raźbiracca. Čytajučy, jana zrazumieła, što niedakładnaść u proźviščy — nie adzinaja. Žančyna, pra jakuju išła havorka ŭ liście, starejšaja za Taćcianu na siem hadoŭ.

Stała zrazumieła: isnuje inšaja Taćciana Piatroŭskaja ź Biełarusi. Vinavataja jana ŭ tym, što pieravoziła mihrantaŭ, jakija nielehalna pierajšli miažu Biełarusi i Polščy. I sapraŭdy ŭniesienaja ŭ admysłovy śpis.

Jak jaje mahli pierabłytać ź ciozkaj? Usio akazałasia da niejmaviernaści prosta: niezadoŭha da tych padziej surazmoŭca Most zakazała ŭ ZŠA BADy dla supakojvańnia — kab lepiej spać. Ale adpraŭščyk ź niejkaj pryčyny skaraciŭ proźvišča, prybraŭšy častku Skapcova. Takaja pradukcyja aŭtamatyčna dekłarujecca. I ŭ sistemie akazałasia, što tavar pryjšoŭ Taćcianie Piatroŭskaj — z taho samaha sankcyjnaha śpisu.

«Sistema abjadnała nas u adnaho čałavieka», — tłumačyć Taćciana.

BADy zabrali, a pakupnicy vysłali list na adras, jaki byŭ paznačany na pasyłcy.

«Kali b viedała, što ja praz BADy ŭvohule nie budu spać, dyk, kaniešnie, ich i nie zakazvała b», — žartuje surazmoŭca.

«Ź niejkaj Dzivaj-Kansuełaj-Alivijaj takoha b nie zdaryłasia»

Biełaruska patelefanavała ŭ adździeł, jaki nakiravaŭ joj list. Rastłumačyła situacyju. Tam pahadzilisia, ale skazali, što biełaruska pavinna davieści da orhana, što jana — nie taja asoba, jakoj tyčycca list.

Spačatku Taćciana nakiravała padatkovaj kartu pobytu i paśviedčańnie ab šlubie, potym spatrebiŭsia skan prajaznoha dakumienta zamiežnika i navat skrynšot kabinieta, praź jaki jana zakazała BADy.

«Kab raspačać spravu, chapiła, ja dumaju, piaci siekund, a kab usio pravieryć i zakryć — spatrebiłasia dva miesiacy. Uvieś hety čas ja była na suviazi i dakazvała, što ja — heta ja», — kaža Taćciana.

4 žniŭnia biełaruscy narešcie pryjšoŭ list, što sprava zakrytaja. Dziaržaŭny orhan pryznaŭ, što patrabavańnie da jaje było pamyłkovym.

«Kali chočacie nazvać svajo dzicia redkim imieniem, to zrabicie heta, — raić ciapier Taćciana. — Bo ź niejkaj Dzivaj-Kansuełaj-Alivijaj takoha b nie zdaryłasia».

Kamientary da artykuła