Kłub z vostrava, dzie žyvie 600 čałaviek, prabiŭsia ŭ asnoŭnuju sietku Kubka Francyi pa futbole
Futbolny kłub «Mikiełon», jaki bazujecca na vostravie Mikiełon — u archipiełahu Sien-Pjer i Mikiełon la bierahoŭ Kanady, prabiŭsia ŭ asnoŭnuju sietku Kubka Francyi pa futbole.
Płošča vostrava Mikiełon — 200 kvadratnych kiłamietraŭ, ale nasielnictva ŭsiaho 623 čałavieki. A voś vostraŭ Sen-Pjer mienšy pa pamierach (26 kvadratnych kiłamietraŭ, ale žyvie 5 500 čałaviek) i na Sen-Pjery skacentravana ŭsia infrastruktura. Fota: Wikimedia Commons
«Mikiełon» zdoleŭ prajści ŭvieś adboračny etap i atrymać prava vystupić u Kubku Francyi, turnir pačynajecca z 1/128 finału.
Kłub reprezientuje vostraŭ, jaki znachodzicca niepadalok ad uźbiarežža Kanady, adnak administracyjna ŭvachodzić u skład Francyi. Na susiednim, bolšym vostravie Sien-Pjer žyvie prykładna piać tysiač žycharoŭ, tamu futbalisty pryvykli da sapraŭdy nievialikaj i vielmi kamiernaj padtrymki.
Ciapier ža kamandu čakajuć pieraloty praz Atłantyku na kožny kubkavy matč. Kali los źviadzie «Mikiełon» z adnym z hrandaŭ, naprykład, z «Pary Sen-Žermienam», francuzskim zorkam daviadziecca adpravicca ŭ padarožža ŭ amal nieviadomy dla bolšaści suajčyńnikaŭ kutok svajoj krainy.
Udzieł kalektyvu z takoj addalenaj terytoryi staŭ adnoj z samych jarkich historyj ciapierašniaj kvalifikacyi i, napeŭna, pryciahnie da archipiełaha ŭvahu zaŭziataraŭ z usioj Francyi.
Wikimedia Commons
Futbolnyja kłuby ź Sien-Pjera i Mikiełona ŭdzielničajuć u Kubku Francyi tolki ź siezona 2018/19. Ale dahetul hulali kamandy z vostrava Sen-Pjer. Za hety čas nivodnamu ź ich nie ŭdałosia pieraadoleć treci raŭnd, dzie jany sustrakalisia z kamandami z kantynientalnaj Francyi.
Novy rozyhryš asnoŭnaj stadyi Kubka Francyi pačniecca ŭ siaredzinie vieraśnia, losavańnie projdzie 23 žniŭnia