Čałaviek-pavuk, jakoha ŭsie zabyli. Čamu «Novy dzień» — adnačasova najlepšy film Marvel za apošnija hady i ŭsio taja ž staraja historyja
Tom Chołand zrabiŭ toje, što nie ŭdałosia jaho papiarednikam.
«Čałaviek-pavuk. Novy dzień». Tut i dalej fota: imdb.com
Uvaha: tekst źmiaščaje spojlery da filma «Čałaviek-pavuk: Novy dzień» i papiarednich častak.
U finale «Niama šlachu dadomu» Piter Parkier atrymaŭ toje, čaho supierhieroi zvyčajna bajacca bolš za śmierć: śviet byŭ vyratavany, ale ŭ hetym śviecie bolš nie zastałosia čałavieka pa imieni Piter Parkier. Jaho zabyli siabry, kachanaja, vykładčyki, dziaržaŭnyja rejestry — usie. Ciotka Mej zahinuła. Kaścium ad Toni Starka, technałahičnyja cacki i status małodšaha ŭdzielnika «Mściŭcaŭ» zastalisia ŭ minułym. U maleńkaj kvatery jon sam pašyŭ sabie novy čyrvona-sini kaścium i vyjšaŭ u śnieh byccam sapraŭdny, kłasičny Čałaviek-pavuk: biedny, samotny i nikomu nie patrebny biez maski.
Heta byŭ amal idealny pačatak novaj historyi. I adnačasova pastka, u jakuju čaćviorty film pra Pavuka Toma Chołanda niepaźbiežna musiŭ trapić. Ci zdolnaja Marvel pakinuć svajho samaha prybytkovaha hieroja sam-nasam ź jaho žyćciom? Ci dazvolić jamu ratavać nie multysuśviet, a niekalkich kankretnych ludziej? I ci moža karcina z Chałkam, Karnikam, Alenaj Białovaj, novaj Džyn Hrej i dziasiatkam namiokaŭ na budučyja prajekty nazyvacca sapraŭdy «novym dniom»?
Adkaz atrymaŭsia paradaksalny. «Novy dzień» — adzin z samych žyvych i čałaviečnych filmaŭ Marvel za apošnija piać-šeść hadoŭ. Ale jaho navizna składajecca pieravažna ź vielmi ŭmieła sabranych starych detalaŭ.
Čałaviek-pavuk. Kadr ź filma
U Biełaruś Pavuka nie puściŭ Kałabok
Suśvietnaja premjera novaha Čałavieka-pavuka adbyłasia 31 lipienia, ale da hledačoŭ u Biełarusi i Rasii film dabiraŭsia asobnaj, davoli absurdnaj darohaj. Pieršapačatkova pakazy ŭ krainach SND čakalisia 6 žniŭnia. Na tuju ž datu rasijski dystrybjutar «Atmośfiera kino» pieranios siamiejny błakbastar «Apošni vołat. Kałabok», i razam z Asacyjacyjaj uładalnikaŭ kinateatraŭ paprasiŭ placoŭki nie pakazvać novaha «Čałavieka-pavuka» da 20 žniŭnia. Aficyjna heta nazvali «antypirackaj inicyjatyvaj» i žadańniem «efiektyŭna raźmierkavać resursy». Tym, chto nie pahodzicca, mahli ŭskładnić atrymańnie budučych relizaŭ.
U Rasii Sony paśla pačatku poŭnamaštabnaj vajny va Ukrainie aficyjna svaje navinki nie vypuskaje, tamu halivudskija chity tam pakazvajuć u šeraj zonie jak «pieradsieansnaje absłuhoŭvańnie» da karotkamietražak. Ale rasijski prakatny kalandar upłyvaje i na nas. U biełaruskich afišach «Novy dzień» u vyniku źjaviŭsia paźniej — z 13 žniŭnia. Tak biełaruskija hledačy taksama apynulisia ŭnutry hetaj baraćby Pavuka z Kałabkom.
Inicyjatyva dała amal karykaturny vynik. Papiarednija prodažy «Kałabka» ŭ Rasii pravalilisia, a paśla vychadu film nakryła chvala pratesnych nizkich acenak. U Biełarusi karcina ŭvohule nie źjaviłasia ŭ prakacie: jaje pakul nie ŭzhadniła Ministerstva kultury. Tak što historyja jašče da pačatku «Čałavieka-pavuka» atrymała siužetny pavarot u najlepšych tradycyjach Marvel: industryja pasprabavała prybrać hieroja z darohi, ale ŭ vyniku tolki pryciahnuła da jaho jašče bolš uvahi.
A ciapier — da samoha filma i Pitera Parkiera, jakoha, u adroźnieńnie ad hledačoŭ, sapraŭdy zabyŭ uvieś śviet.
Čałaviek-pavuk i čyrvonyja nindzia. Kadr ź filmu
Śviet bieź Pitera Parkiera
Prajšło čatyry hady. Piter žyvie adzin i faktyčna pracuje Čałaviekam-pavukom poŭny dzień. Užo pieršyja kadry pakazvajuć, kolki ŭsiaho adbyłosia biez nas: Skarpijon, Bumieranh, Nasaroh i inšyja złydni źjaŭlajucca na niekalki siekund, niby vokładki starych komiksaŭ, što raptam ažyli. Film nie spyniajecca, kab kožnamu vydać bijahrafiju i piatnaccacichvilinnuju historyju pachodžańnia. Jany isnujuć u hetym Ńju-Jorku, Pavuk ź imi biŭsia — hetaha dastatkova.
Bojka Čałavieka-pavuka i Skarpijona. Kadr ź filma
Heta adzin z hałoŭnych pryncypaŭ karciny. Tom Chołand kaliści taksama ŭvajšoŭ u kinasuśviet užo hatovym Čałaviekam-pavukom: hledaču ŭ treci raz nie stali pakazvać radyjeaktyŭnaha pavuka, ukus i śmierć dziadźki Bena. Ciapier hetak ža naturalna ŭ siužet zachodziać Karnik, Alena Białova i Brus Benier. Fanat viedaje ich minułaje i zaŭvažyć dadatkovyja sensy. Navičku dastatkova razumieć słužbovuju rolu: Białova zdabyvaje infarmacyju, Karnik dobra stralaje i nie maje maralnych prablem z zabojstvam, Benier viedaje, što takoje žyć u ciele, jakoje moža vyjści z-pad kantrolu.
Nie ŭsie detali pry hetym adnolkava dastupnyja. Šafa Frenka Kasła z fotazdymkami siamji značna macniej pracuje dla taho, chto viedaje historyju Karnika.
Karnik — były marski piachotnik Frenk Kasł, jaki paśla zabojstva siamji pačaŭ žorstka raspraŭlacca sa złačyncami. U adroźnieńnie ad Čałavieka-pavuka, jon nie vieryć u litaść i nie baicca zabivać.
Čyrvonyja nindzia Ruki nie ŭźnikajuć z pustaty — arhanizacyja ŭžo była ŭ sieryjałach pra Sarvihałavu, ale pierahladzieć dla razumieńnia adnaho filma niekalki siezonaŭ sieryjału navažycca daloka nie kožny. Marvel daŭno pieratvaryła ŭzajemaźviazanaść historyj u markietynhavuju madel: hladzi ŭsio, inakš nastupny frahmient budzie mienš zrazumieły.
«Novy dzień», na ščaście, pakul trymajecca na pravilnym baku hetaj miažy. Inšyja hieroi tut pieravažna słužać historyi Pitera, a nie zamianiajuć jaje. Ale ŭ finale miaža pačynaje niebiaśpiečna ściracca.
Novaje naradžeńnie ŭ čaćviortym filmie
Hałoŭny žart nazvy ŭ tym, što Chołandaŭ Pavuk atrymlivaje ŭłasnuju historyju pachodžańnia tolki ŭ čaćviortym solnym filmie. My nie bačyli, jak jon upieršyniu vučyŭsia łazić pa ścienach. Zatoje ciapier jaho arhanizm mianiajecca nanova: z ruk pačynaje vylatać arhaničnaje pavucińnie, pavučynaje čućcio robicca pakutliva adčuvalnym, a razam ź siłaj raście ahresija. Piter iznoŭ padaje, urazajecca ŭ pieraškody i sprabuje zrazumieć, jaki žest prymušaje pavucińnie pracavać.
Piter Parkier. Kadr ź filma
Heta vyrazny revierans viersii Tobi Mahuajra ź filma Sema Rejmi 2002 hoda. Tam Piter taksama ź niedavieram razhladaŭ dziŭnyja źmieny ŭ zapiaściach i pierabiraŭ žesty, pakul nie navučyŭsia stralać pavucińniem. Ale ŭ «Novym dni» paŭtor maje inšy sens. Tady cieła paviedamlała padletku, što jon staŭ asablivym. Ciapier ža jano nahadvaje darosłamu hieroju: nielha biaskonca dušyć u sabie bol, tuhu, złość i žadańnie być pobač ź blizkimi.
Piter vyrašyŭ, što samaachviarnaść patrabuje poŭnaj izalacyi. Jon naziraje za Em-Džej i Nedam zdalok, sočyć za ich žyćciom i nazyvaje heta kłopatam. Pa sutnaści ž jon robić toje samaje, što bujnyja karparacyi i dziaržaŭnyja struktury ŭ hetym filmie: niezakonna źbiraje źviestki pra ludziej, bo ŭpeŭnieny, što lepš za ich viedaje, što im patrebna. Jaho vysakarodnaść pastupova stanovicca formaj kantrolu.
Piter naziraje za svaim lepšym siabram Nedam, jaki jaho zabyŭ. Kadr ź filma
Cieła paŭstaje suprać hetaha kantrolu. U hetym sensie «Novy dzień» — amal palehčany body-chorar: dušeŭnaja traŭma litaralna prarastaje praz skuru.
Try mužčyny, jakija nie ŭmiejuć abychodzicca sa złościu i bolem
Brus Benier i Frenk Kasł patrebnyja filmu nie tolki jak paznavalnyja tvary. Jany pakazvajuć Piteru dva mahčymyja vyniki žyćcia ź niepierapracavanaj traŭmaj.
Benier padaŭlaje Chałka z dapamohaj technałohii i buduje spakojnaje žyćcio ŭniviersiteckaha prafiesara. Zdajecca, jon narešcie navučyŭsia kantralavać svaju druhuju sutnaść. Ale pad hetym intelektualnym i ŭtulnym fasadam pa-raniejšamu chavajecca nazapašanaja lutaść — i istota, jakaja choča kryšyć usio navokał.
Piter Parkier pryjšoŭ va ŭniviersiteckuju aŭdytoryju da prafiesara Brusa Beniera. Kadr ź filma
Kali ž sapraŭdny Chałk narešcie viartajecca, film na niekalki chvilin addajecca čystaj dziciačaj radaści. Pierad nami ŭžo nie razvažlivy razumny «prafiesar Chałk», a toj samy vializny zialony hramiła, jaki ŭdaram dałoniaŭ stvaraje mahutnuju chvalu. Hety firmovy pryjom hieroja daŭno nie źjaŭlaŭsia na ekranie.
Čałaviek-pavuk i Chałk. Brus Benier staŭ Chałkam paśla taho, jak trapiŭ pad mahutnaje hama-vypramieńvańnie padčas niaŭdałaha ekśpierymientu. Radyjacyja nie zabiła jaho, a pieratvaryła padaŭleny bol i hnieŭ navukoŭca ŭ asobnuju mahutnuju istotu. Čym macniej jon pakutuje i złujecca, tym bolš niebiaśpiečnym i niekantralavanym stanovicca. Kadr ź filma
Stvaralniki filma dobra razumiejuć: časam hledaču nie patrebnyja składanyja tłumačeńni i pieraasensavańni, dastatkova dać Chałku narešcie niešta raźbić.
Karnik, naadvarot, ničoha ŭ sabie nie padaŭlaje. Jon pieratvaryŭ bol ad zabojstva jaho siamji ŭ mietad: kali prablemu možna zastrelić, navošta ź joj razmaŭlać? Tamu para Frenka i Pitera pracuje tak dobra. Frenk hatovy spačatku zabić, a paśla zadavać pytańni, a Piter navat u bojcy sprabuje vysłuchać voraha. U hetym filmie Piter u vykanańni Chołanda staŭ cišejšym i ŭžo nie tak časta syple žartami. Ale ŭ duecie sa zmročnym i biaźlitasnym Kasłam asabliva vyrazna prajaŭlajucca jahonaja miakkaść i niežadańnie adkazvać na hvałt jašče bolšym hvałtam.
Čałaviek-pavuk i Karnik. Kadr ź filma
Ich dynamika nie tolki dramatyčnaja. Karnik, jaki ŭ balnicy naciahvaje masku Čałavieka-pavuka, — adzin z samych śmiešnych epizodaŭ filma. Hetuju ž hulniu z supierhierojskimi ŭmoŭnaściami praciahvaje scena ŭ łaźni: hieroj hatovy raspranucca amal całkam, ale ni za što nie zdymie masku i nie adkryje tvar. Staraja komiksnaja tradycyja tut daviedzienaja da absurdu: u adroźnieńnie ad Žaleznaha čałavieka, jaki achvotna raskryŭ svaju asobu ŭsiamu śvietu, inšyja supierhieroi chutčej zvaracca ŭ łaźni, čym admoviacca ad tajamnicy.
Film sabrany z taho, što my ŭžo lubili
U kino ŭžo było niekalki viersij Čałavieka-pavuka — spačatku Piter Parkier Tobi Mahuajra, potym Endru Harfiłda, a paśla Tom Chołand. I mienavita Chołand staŭ unikalnym vypadkam dla franšyzy: jon pratrymaŭsia ŭ čatyroch solnych filmach, pryčym kožny nastupny hledačy prymali ŭsio ciaplej. U jaho papiarednikaŭ dynamika była advarotnaj: jarki start pastupova źmianiaŭsia rasčaravańniem, i film davodziłasia pierazapuskać.
«Novy dzień» vielmi ciažka nazvać aryhinalnym, i hetak ža ciažka abvinavacić jaho ŭ niaŭmieńni karystacca zapazyčanym. Karcina pracuje jak dobry dydžejski set: biare paznavalnyja elemienty z roznych epoch i zvodzić ich u rytmičnuju kampazicyju.
Amal kožny z hetych pryjomaŭ užo sustrakaŭsia ŭ raniejšych supierhierojskich filmach. Arhaničnaje pavucińnie i niaŭkludnyja sproby Pitera avałodać novymi zdolnaściami adsyłajuć da tryłohii Sema Rejmi. Pavyšanaja ahresija Pitera nahadvaje treciuju častku, dzie čorny kaścium taksama vyciahvaŭ vonki najhoršyja rysy hieroja. Kadry vačyma Pavuka ŭžo efiektna pracavali ŭ filmach z Endru Harfiłdam, a zapavolenaje ŭchileńnie ad siurykienaŭ nahadvaje adrazu Nea, jaki ŭchilaŭsia ad kul u «Matrycy», i Fłeša, jaki ŭ «Lizie spraviadlivaści» hetak ža ŭnikaŭ betaranha — mietaličnaj zbroi Betmiena. Płastyka častki bojek vyhladaje tak, niby kamiera časova pierajšła ŭ videahulniu pra Čałavieka-pavuka.
Kadr ź filma, jaki nahadvaje vokładku komiksa
Navat vialikaja pavucina, jakoj hieroj spyniaje viertalot, vyklikaje ŭ pamiaci tyzier «Čałavieka-pavuka» 2002 hoda: u im złačynny viertalot zavisaŭ u pavucinie pamiž viežami Suśvietnaha handlovaha centra. Paśla teraktaŭ 11 vieraśnia rekłamu źniali z pakazu, a epizod u sam film nie ŭvajšoŭ.
Film vykarystoŭvaje nie tolki vobrazy z papiarednich ekranizacyj, ale i žarty, jakija hadami žyli ŭ internecie. Na lekcyi studenty pytajucca ŭ Brusa Beniera, čamu Tanas zamiest źniščeńnia pałovy nasielnictva Suśvietu prosta nie stvaryŭ udvaja bolš resursaŭ. Hetym pytańniem fanaty Marvel zadavalisia jašče paśla «Vajny biaskoncaści». Ciapier aŭtary narešcie zapuścili staruju internet-sprečku ŭ sam kinasuśviet i pieratvaryli adnu z hałoŭnych pretenzij da łohiki Tanasa ŭ karotki žart dla svaich ža hledačoŭ.
Dla ekranizacyj komiksaŭ taki padychod całkam naturalny. Najlepšyja supierhierojskija filmy redka pieranosiać na ekran adnu kankretnuju historyju kadr za kadram. Zvyčajna jany biaruć matyŭ tut, vobraz tam, kanflikt z treciaj historyi i źbirajuć ułasnuju viersiju. Znajomyja elemienty mohuć zahučać pa-novamu, kali aŭtary napaŭniajuć ich inšym sensam.
U «Novym dni» heta ŭdajecca nie zaŭsiody. Adnak hałoŭnaja mietafara filma — mutacyja jak fizičnaje ŭvasableńnie padaŭlenych pačućciaŭ — sapraŭdy złučaje razroźnienyja zapazyčańni ŭ sucelnuju historyju.
Idealny miechanizm i jaho pradkazalnaść
Dramaturhičnaja schiema filma davoli prostaja. Pieršyja paŭhadziny pakazvajuć samotnaje žyćcio Pitera. Potym hieroj admaŭlajecca pryniać źmieny ŭ sabie i šukaje sposab ich zahłušyć. Novaja pahroza zdajecca złom, ź jakim treba zmahacca. Paśla vyśviatlajecca, što mierkavanaha voraha treba ratavać, a niebiaśpieka zychodzić ad sistemy, jakaja baicca niezrazumiełych joj ludziej. Narešcie Piter prymaje ŭłasnuju pryrodu, pierastaje daviarać technałahičnamu «namordniku» i ŭ finale kłasična ratuje dziaŭčynu (ale nie tuju, pra kaho vy chutčej za ŭsio padumali).
Heta šlach hieroja, adładžany jak hadzińnik. Niečakanaść tut nie ŭ tym, kudy jon pryviadzie, a ŭ drobnych pavarotach miechanizma. Režysior Destyn Denieł Kretan, viadomy pa marviełaŭskim filmie «Šan-Čy i lehienda dziesiaci piarścionkaŭ», umieje rabić bojku praciaham charaktaru. Tamu ekšen u najlepšych epizodach raskryvaje dramu i pakazvaje, chto z hierojaŭ straciŭ kantrol, chto vybiraje zabojstva i chto jašče zdolny spynicca.
Piter Parkier. Kadr ź filma
Prablema ŭźnikaje, kali mašyna pačynaje absłuhoŭvać nie hety film, a nastupnyja. Departamient likvidacyi nastupstvaŭ pieratvarajecca z kamandy pa pryborcy supierhierojskich razbureńniaŭ u amal što palicyju pa adłovie mutantaŭ. Technałohija Beniera, jakuju Piter madyfikuje dla kantrolu nad saboj, stanovicca pratatypam pryłady dla padaŭleńnia mutanckich zdolnaściaŭ. A piersanaž Sedzi Sink akazvajecca Džyn Hrej — adnoj z centralnych hieraiń «Ludziej Iks».
Tak intymnaja historyja pra adzinotu Pitera raptam robicca bramaj u mutanckuju epochu Marvel.
Džyn Hrej: hierainia ci prezientacyja nastupnaj franšyzy?
Džyn Hrej. Kadr ź filma
Tematyčna Džyn upisanaja dakładna. Jana, jak Piter, zastajecca samotnaj ź siłaj, jakuju nie razumieje i jakoj bajacca inšyja. Abodva vybuchajuć ahresijaj, ale nie tamu, što złyja, jany prosta nie majuć biaśpiečnaha sposabu pražyć hora. Abodva sutykajucca ź sistemaj, jakaja nazyvaje hvałt kłopatam i choča zrabić niezvyčajnaje kiravanym.
Ale industryjalna jaje źjaŭleńnie — jašče i vializny rekłamny ščyt: «Ludzi Iks užo tut». Marvel adnačasova raspaviadaje historyju Pitera i rasstaŭlaje rejki na hady napierad. Alena Białova rasšyfroŭvaje materyjały pra tajemnyja ekśpierymienty, Departamient nazapašvaje źviestki pra mutantaŭ, paślatytravaja scena namiakaje jašče na adnaho Pavuka — mahčyma, ź inšaj realnaści abo z kosmasu.
Mienavita tut aptymistyčnaja i piesimistyčnaja recenzii na film razychodziacca. Dla adnych heta najlepšaja rysa žyvoha komiksnaha śvietu: hieroi žyvuć u adnym Ńju-Jorku i łahična sustrakajucca. Dla inšych — dokaz, što Marvel nie ŭmieje skončyć skaz, nie pačaŭšy adnačasova try nastupnyja.
Ci nie admianiaje film ułasnuju trahiedyju
Najbolš dalikatnaja častka — viartańnie Em-Džej i Neda. Finał «Niama šlachu dadomu» byŭ mocny mienavita niezvarotnaściu vybaru: Piter paabiacaŭ usio rastłumačyć, ale ŭbačyŭ, što siabry bieź jaho ŭ biaśpiecy, i pramaŭčaŭ. Kali «Novy dzień» prosta viernie staruju kampaniju mahičnaj knopkaj, papiaredniaja achviara pieratvorycca ŭ tanny truk.
Na ščaście, film nie admianiaje zaklon imhnienna. Ned i Em-Džej nie atrymlivajuć staryja ŭspaminy ŭ hatovym vyhladzie. Piteru davodzicca ŭvachodzić u ich žyćcio jak nieznajomcu — niajomka, baluča i biez harantyi, što jany znoŭ pakachajuć taho ž čałavieka.
Em-Džej i Čałaviek-pavuk. Kadr ź filma
Heta bolš cikavaja zadača, čym miechaničnaje «viartańnie pamiaci»: ci možna pabudavać tyja samyja adnosiny nanova, kali ahulnaja historyja źnikła?
Tut asabliva dobra pracuje Ziendeja. Jaje Em-Džej — nie pryz za vyratavańnie horada i nie dziaŭčyna, jakuju scenar abaviazany viarnuć hieroju. Jana adčuvaje niezrazumiełuju blizkaść, ale maje prava nie viedać Pitera i ruchacca dalej.
Em-Džej. Kadr ź filma
Realnaja historyja Chołanda i Ziendei niepaźbiežna dadaje scenam pazatekstavuju vahu: hledačy nazirali, jak akciory raśli razam amal dziesiać hadoŭ, i ciapier ich ekrannym hierojam prapanujuć paznajomicca ŭpieršyniu.
Čamu ŭsie ŭsio jašče lubiać Čałavieka-pavuka
U suśviecie Marvel jość macniejšyja hieroi, bahaciejšyja miljardery i bolš vieličnyja bohi. Ale Piter Parkier zastajecca samym čałaviečnym ź ich. U adroźnieńnie ad inšych supierhierojaŭ jon nie maje ni hrošaj, ni ŭpłyvu, ni paśpiachovaj karjery. Jon nie Kłark Kient — paśpiachovy žurnalist i adnačasova Supiermien, pobač ź jakim jahonaja kachanaja Łois Łejn. I nie Toni Stark — miljarder, uładalnik vielizarnaj karparacyi i Žalezny čałaviek z cełym arsienałam vysokatechnałahičnaj zbroi. Piter — zvyčajny chłopiec ź niebahataj siamji ŭ Kvinsie, sirata, u jakoha viečna nie ładzicca z hrašyma, vučobaj i asabistym žyćciom. Čałavieka-pavuka mohuć abahaŭlać natoŭpy, ale samomu Piteru časam niama čym zapłacić za kvateru.
Viersija Chołanda peŭny čas adchilałasia ad hetaj formuły. Jana atrymała miljardera-nastaŭnika, technałahičny kaścium i imhnienny dostup da «Mściŭcaŭ». «Novy dzień» narešcie zabiraje padarunki Toni Starka i pakidaje chłopcu toje, što zaŭsiody rabiła Pavuka Pavukom: adkaznaść biez uznaharody.
Piter Parkier. Kadr ź filma
Jość i jašče adna pryčyna kasavaha fienomienu. Kožny solny film Chołanda zakančvajecca pytańniem, jakoje niemahčyma nie panieści z saboj. U pieršym filmie Ciotka Mej daviedałasia, chto chavajecca pad maskaj. Potym uvieś śviet daviedaŭsia, chto jon. Potym uvieś śviet zabyŭ Pitera. Ciapier Ned pačynaje paznavać čałavieka, jakoha nie pavinien pamiatać, a Em-Džej staić na parozie taho ž adkryćcia. Heta struktura vielmi darahoha sieryjała: «A što dalej?» — hałoŭnaja zvyšzdolnaść franšyzy.
Novy dzień, jaki my ŭžo bačyli
Amierykanskaja presa pryniała karcinu pieravažna dobra, ale biez adnadušnaści. Na Metacritic jana atrymała 66 bałaŭ sa 100. Adny krytyki nazyvajuć jaje najlepšym filmam MCU za niekalki hadoŭ i najlepšaj pracaj Chołanda ŭ roli Pitera. Inšyja bačać upuščanuju mahčymaść: finał papiaredniaj častki vyzvaliŭ hieroja ad usiaho bahažu, ale studyja znoŭ abkłała jaho znajomymi hierojami, praciahami i abaviazkami.
Razmovy pra «najlepšy film Marvel za apošnija hady» šmat havorać pra stan samoj studyi. Paśla «Mściŭcaŭ: Finał» jana vypuskała prajekty amal kanviejernymi tempami, adnačasova pašyrajučy kinasuśviet sieryjałami. Historyj i novych hierojaŭ stanaviłasia ŭsio bolš, a paŭnavartasnych filmaŭ siarod ich — usio mienš. Adny karciny vyhladali tolki prałohami da budučych padziej, inšyja patrabavali znajomstva ź niekalkimi sieryjałami, trecija znoŭ prapanoŭvali tuju ž pahrozu źniščeńnia śvietu pad płastom niaroŭnaj kampjutarnaj hrafiki. Navat udałyja prajekty ŭsio čaściej usprymalisia jak vyklučeńni na fonie ahulnaj stomlenaści ad Marvel.
«Novy dzień» vyjhraje ŭžo tym, što viartaje ŭ centr kankretnaha čałavieka. Piteru nie treba ratavać śviet, jamu treba dać rady ŭłasnaj adzinocie, ahresii i niemahčymaści być pobač z tymi, kaho jon lubić. Paśla niekalkich hadoŭ pierahružanych suviaziami i padrychtoŭkaj da nastupnych franšyz prajektaŭ takaja prostaja čałaviečaja historyja sapraŭdy ŭsprymajecca amal jak novy pačatak.
Tamu abodva baki majuć racyju.
Bitva Čałavieka-pavuka z Čyrvonymi nindzia. Kadr ź filma
«Novy dzień» viartaje Čałavieku-pavuku serca. Staŭki tut pieravažna asabistyja, a nie kaśmičnyja. Chołand pierastaje być havarlivym padletkam pry darosłych supierhierojach, ciapier jon hraje čałavieka, čyjo dabro pačynaje miažvać z samarazbureńniem. Karnik i Chałk nie prosta machajuć hledaču z susiednich franšyz, jany ŭvasablajuć roznyja sposaby žyć z bolem i złościu. Navat mutacyja Pitera akazvajecca mietafaraj taho, što pačućci nielha biaskonca vyklučać.
I ŭsio ž aŭtary nie navažvajucca da kanca zachavać kamiernaść hetaj historyi. Film pačynajecca jak apovied pra chłopca, jakoha nichto nie pamiataje, a zaviaršajecca raskładvańniem fihur dla «Ludziej Iks», novych «Mściŭcaŭ» i nastupnaha Paŭka. Jon abiacaje novy pačatak, tolki źbiraje jaho z papiardnich filmaŭ, komiksaŭ, hulniaŭ, «Matrycy», «Lihi spraviadlivaści» i ŭłasnaha katałoha Marvel.
Mahčyma, u hetym i jość jaho sutnaść. «Novy dzień» jak vielmi dobra zrobleny vypusk staroha komiksa: ź jarkaj vokładkaj, niečakanym hościem na piataj staroncy, bojkaj pasiaredzinie i apošnim kadram, paśla jakoha treba kupić nastupny numar.
I my, viadoma, kupim. Nie, nie tamu, što Marvel znoŭ paabiacała źmianić uvieś suśviet, heta ŭžo nadakučyła. Bolš cikava toje, što Piter Parkier usio jašče nie viedaje, jak žyć u hetym suśviecie zaŭtra.