U Novarasijsku spyniŭ pracu apošni z troch zbožžavych terminałaŭ

Zbožžavy terminał KSK u porcie rasijskaha Novarasijska časova spyniŭ pracu «ŭ metach harantavańnia biaśpieki rabotnikaŭ i infrastruktury». Takim čynam, ciapier nie pracuje nivodzin z troch asnoŭnych zbožžavych terminałaŭ hetaha porta.

Terminał KSK. Fota: Wikimedia Commons

Terminał KSK spyniŭ razhruzku aŭtamabilnaha i čyhunačnaha transpartu, pahruzku zbožža na marskija sudny i inšyja apieracyi. Raniej, 12 žniŭnia, paśla atak ukrainskich bieśpiłotnikaŭ pracu prypynili dva inšyja terminały.

KSK źjaŭlajecca adnym z najbujniejšych hłybakavodnych zbožžavych terminałaŭ Rasii. Jaho mahutnaść pa pieravałcy składaje 10,5 miljona ton zbožžavych hruzaŭ u hod. Dla paraŭnańnia, mahutnaść inšych dvuch terminałaŭ składaje 8,5 miljona i 7,1 miljona ton u hod.

Takim čynam, spynieńnie pracy ŭsich troch abjektaŭ zakranuła značnyja mahutnaści pa eksparcie rasijskaha zbožža praz port Novarasijska.

Masavanaja ataka ŭkrainskich bieśpiłotnikaŭ na rasijski Krasnadarski kraj adbyłasia ŭ noč na 12 žniŭnia. Pavodle infarmacyi hubiernatara Vienijamina Kandraćjeva, najbolš mocna paciarpieŭ mienavita Novarasijsk. Było paškodžana kala 60 žyłych damoŭ, a taksama abjekty vadapravoda i darožnaja infrastruktura. Try čałavieki zahinuli, 24 atrymali ranieńni.

Ukrainski Hienštab, u svaju čarhu, zajaviŭ, što padčas ataki na abjekty ŭ Novarasijsku byli paškodžanyja čatyry karabli rasijskaha Vajskova-marskoha fłotu: frehaty «Admirał Makaraŭ» i «Admirał Esen», mały rakietny karabiel «Bujan-M» i vartavy karabiel «Vasilij Bykaŭ».

Pry hetym krasnadarski hubiernatar u svaim paviedamleńni pra nastupstvy ataki nie zhadvaŭ pra paškodžańnie zbožžavych terminałaŭ. Adnak paśla ataki dva ź ich adrazu prypynili pracu, a na nastupny dzień da ich dałučyŭsia i KSK.

Kamientary da artykuła