Suzasnavalnica «Makiej» sychodzić z kampanii i zasiarodzicca na ŭłasnym brendzie

Kreatyŭnaja dyrektarka i suzasnavalnica hrodzienskaj kampanii «Makiej» Łarysa Makiej sychodzić ź siamiejnaha biznesu. Ciapier jana maje namier całkam zasiarodzicca na raźvićci ŭłasnaha brenda L’epatage, jaki stvaraje razam z dačkoj Darjaj, piša Hrodna.life.

Pradukcyja brenda «Makiej». Fota: vk.ru/makeyby

Historyja hrodzienskaha brenda skurhałantarei «Makiej» pačałasia ŭ 1990 hodzie ź nievialikaj siamiejnaj majsterni. Pavodle słoŭ ułaśnika kampanii Vitala Makieja, usio pačałosia sa skuranoha błaknota, jaki sužency zrabili ŭ padarunak siabram.

«Praź niejki čas sustrakaju ich, a jany kažuć: «Tak pryhoža, što vaš padarunak dahetul upryhožvaje naš stoł». I tady ja padumaŭ — možna adnavić narodnyja promysły i pasprabavać viarnuć staryja tradycyi. Ničoha novaha my nie prydumali — prosta viarnulisia da starych vytokaŭ», — uzhadvaŭ Vital Makiej.

Pakłapacicca pra vytvorčaść napačatku dapamahali tolki svajaki: maci Vitala zajmałasia raskrojem skury, Łarysa adkazvała za dyzajn, a brat dapamahaŭ z vytvorčaściu.

Za try dziesiacihodździ siamiejnaja sprava vyrasła ŭ bujnuju kampaniju z bolš čym 300 supracoŭnikami. Siońnia pradukcyja «Makiej» pradajecca ŭ Biełarusi, Rasii, Litvie, Polščy, Čechii, Vialikabrytanii i inšych krainach. Z 2008 hoda kampanija źjaŭlajecca rezidentam SEZ.

Kampanija vypuskaje skuranuju hałantareju i dziełavyja aksesuary, pradmiety interjeru i aŭtarskija suvieniry. Łarysa Makiej z momantu zasnavańnia kampanii adkazvała za raspracoŭku dyzajnu i ŭsioj liniejki aksesuaraŭ.

Łarysa Makiej. Fota: skryn ź videa / instagram.com/lepatage.brand

Brend L'epatage Łarysa Makiej stvaryła razam z dačkoj Darjaj, jakaja taksama dałučyłasia da siamiejnaj spravy. Novy prajekt zadumvaŭsia jak bolš śmieły i kanceptualny kirunak, jaki adroźnivajecca ad kłasičnaha stylu «Makiej».

U asnovie kalekcyj L'epatage — žanočyja skuranyja karsety, baski i akcentnyja aksesuary.

Ciapier, jak paviedamlajecca ŭ sacyjalnych sietkach hetaha brenda, Łarysa Makiej całkam zasiarodzicca na tvorčaj pracy ŭ L'epatage i dalejšym pašyreńni jaho kalekcyj. Pavodle słoŭ kamandy prajekta, heta dazvolić raźvivać novy kirunak biez abmiežavańniaŭ, źviazanych z estetykaj kłasičnaha brenda.

Kamientary da artykuła