Ukrainskija drony «źniščyli» braniatankavuju bryhadu ZŠA na vajskovych vučeńniach
Ukraincy «źniščali» techniku tak chutka, što amierykanskija padraździaleńni davodziłasia viartać u vučeńni jak novyja, kab manieŭry prosta nie spynialisia.
Ukrainski vajskoviec rychtuje ŭdarny dron «Čakłun», jaki vykarystoŭvajecca dla naniasieńnia hłybokich udaraŭ pa rasijskich pazicyjach u Krymie. Fota: AP Photo/Dan Bashakov
Na vajennych vučeńniach Combined Resolve u Hiermanii (jany prachodzili ŭ krasaviku—mai hetaha hoda) ukrainskija apieratary dronaŭ «źniščyli» amierykanskuju braniatankavuju bryhadu.
U vučeńniach udzielničali kala 3 500 amierykanskich vajskoŭcaŭ, pieravažna z 3‑j braniatankavaj bryhadnaj bajavoj hrupy 1‑j kavaleryjskaj dyvizii. Ich zadačaj było atakavać pazicyju, jakuju abaraniali siły ŭmoŭnaha praciŭnika, uzmocnienyja ŭkrainskimi vajskoŭcami z 412‑ha połka Sił bieśpiłotnych sistem «Niemiezida», raskazvaje The Wall Street Journal.
Amierykanskaja braniatechnika padymała pył i była lohka zaŭvažnaja dla ŭkrainskich raźviedvalnych dronaŭ. Za raźviedkaj išli drony-bambaviki i FPV-drony (drony-kamikadze).
Ukraincy «źniščali» techniku tak chutka, što amierykanskija padraździaleńni davodziłasia viartać u vučeńni jak novyja, kab manieŭry prosta nie spynialisia.
Da kanca dvuchtydniovych vučeńniaŭ amierykancy stali dziejničać lepš — navučylisia razhrupoŭvacca, maskavacca i aktyŭniej vykarystoŭvać REB. Ukraincy paźniej taksama pamianialisia bakami i dapamahli amierykancam samim efiektyŭna vykarystoŭvać drony ŭ nastupie.
Heta nie adzinkavy vypadak: takija parazy ad ukrainskich dronaŭ amierykanskija i sajuznyja siły (Vialikabrytanija, Estonija, Šviecyja) užo ciarpieli na vučeńniach u krainach Bałtyi i Šviecyi.
Viarchoŭny hałoŭnakamandujučy NATA Aleksus Hrynkievič adznačyŭ, što paśla vučeńniaŭ z ukraincami prahres amierykanskich vojskaŭ «uražalny».
Navukovy supracoŭnik analityčnaha Centra stratehičnych i mižnarodnych daśledavańniaŭ (CSIS) Elijat Koen ličyć, što amierykanskamu vojsku pakul nie ŭdajecca asvoić dronnuju vajnu na naležnym uzroŭni.