Žychar Kijeva hołym vypackaŭsia ŭ smału, kab unačy abrabavać kramu. Admyvali jaho piać hadzin
U Kijevie mužčyna vypackaŭsia smałoj, kab stać «nieprykmietnym» u ciemry i abrabavać kramu. Palicejskija zatrymali jaho, admyli i zaviali kryminalnuju spravu, piša «Ukrainskaja praŭda».
Fota: Nacyjanalnaja palicyja Ukrainy
Zdareńnie adbyłosia ŭnočy 13 žniŭnia ŭ pamiaškańni praduktovaha supiermarkieta ŭ Śviatošynskim rajonie. Parušalnika zatrymali patrulnyja palicejskija.
Pavodle danych śledstva, 26‑hadovy miascovy žychar vyrašyŭ abrabavać kramu, vykarystaŭšy niezvyčajny sposab maskavańnia. Dla hetaha jon zalez u bočku sa smałoj, jakaja stajała na terytoryi budoŭli, spadziejučysia takim čynam źlicca ź ciemraj.
Fota: Nacyjanalnaja palicyja Ukrainy
Paśla mužčyna vybiŭ nahoj šklanyja dźviery i pranik u pamiaškańnie, dzie skłaŭ u miašok cyharety, sok, cukierki, apielsiny, hrejpfruty i vilhotnyja survetki. Nabrać usiaho bolš pieraškodzili achoŭniki ŭstanovy, ad jakich jon kinuŭsia naŭcioki.
Fota: Nacyjanalnaja palicyja Ukrainy
Ale i na hetym parušalnik nie spyniŭsia, kažuć u palicyi, — pa darozie dadomu jon pačaŭ kidać kamiani ŭ vokny liceja. U hety momant jaho ź miaškom kradzienaha i zatrymali pravaachoŭniki.
Fota: Nacyjanalnaja palicyja Ukrainy
«Zrešty, najciažejšaja častka pracy čakała palicejskich užo paśla. Kab adpravić mužčynu va ŭpraŭleńnie palicyi i dapytać — jaho treba było admyć. Dla hetaha pravaachoŭniki patracili bolš za piać hadzin, ščotki dla abutku, 12 litraŭ alivy i 4 litry myjnaha srodku.
Fota: Nacyjanalnaja palicyja Ukrainy
Śledčyja Śviatošynskaha ŭpraŭleńnia palicyi paviedamili jamu pra zaviadzieńnie kryminalnaj spravy pa č. 4 art. 186 i č. 1 art. 296 Kryminalnaha kodeksa Ukrainy — rabavańnie i chulihanstva», — paviedamlaje pres-słužba Nacyjanalnaj palicyi Ukrainy.
Čytajcie taksama:
Biełaruski «złodziej u zakonie» ŭdzielničaŭ u anłajn-schodkach aŭtarytetaŭ va ŭkrainskich SIZA