Ukraina zajaviła pra ŭdar pa chimičnym kambinacie ŭ Rastoŭskaj vobłaści, dzie vyrablajuć rakietnaje paliva
Siły abarony Ukrainy ŭ noč na 16 žniŭnia nanieśli ŭdar pa pradpryjemstvie rasijskaha vajenna-pramysłovaha kompleksu — FKP «Kambinat Kamienski» ŭ Kamiensku-Šachcinskim Rastoŭskaj vobłaści. Hienštab USU paviedamiŭ, što na terytoryi pradpryjemstva zafiksavali pažar.
Kambinat vyrablaje ćviordaje rakietnaje paliva dla bojeprypasaŭ reaktyŭnych sistem załpavaha ahniu «Urahan», «Śmierč» i «Tarnada-S», a taksama dla inšych rakietnych i avijacyjnych sistem. Pradukcyja pradpryjemstva vykarystoŭvajecca dla zabieśpiačeńnia rasijskaj armii.
Zhodna z adkrytymi źviestkami, «Kambinat Kamienski» ŭvachodzić u strukturu dziaržaŭnaj karparacyi «Rastech». Siarod najbujniejšych zakazčykaŭ — tulskaje NVA «SPŁAV», jakoje raspracoŭvaje rasijskija RSZA, Kanstruktarskaje biuro pryborabudavańnia i «Raskosmas».
Hubiernatar Rastoŭskaj vobłaści Juryj Ślusar niepasredna pra ŭdar pa kambinacie nie paviedamlaŭ. Jon zajaviŭ, što ŭ vyniku rakietna-dronavaj ataki na vobłaść zahinuli piać čałaviek. Pavodle jaho, najbolš paciarpieŭ Kamiensk-Šachcinski: tam byli paškodžanyja žyłyja damy i administracyjnyja budynki, vybityja vokny ŭ šmatkvaternym domie i na čyhunačnym vakzale.