Łatvijskaja tenisistka budzie vystupać za Biełaruś, u jaje 808‑ie miesca ŭ rejtynhu
Kamiła Bartonie, miarkujučy z adkrytych źviestak, bolš nie pradstaŭlaje Łatviju na mižnarodnaj arenie.
24‑hadovaja tenisistka Kamiła Bartonie, vierahodna, źmianiła spartyŭnaje pradstaŭnictva z Łatvii na Biełaruś. Na heta pakazvajuć źmieny ŭ jaje profilach na sajtach Žanočaj tenisnaj asacyjacyi (WTA) i Mižnarodnaj fiederacyi tenisa (ITF), piša bb.lv.
Choć Łatvija bolš nie paznačanaja jak kraina spartsmienki, u zychodnym kodzie staronak Bartonie jana paznačanaja jak biełaruskaja tenisistka. Pry hetym pradstaŭniki Biełarusi i Rasii na turnirach WTA i ITF praciahvajuć vystupać u niejtralnym statusie.
Dadatkovym paćviardžeńniem mahčymych źmien stała źjaŭleńnie Bartonie ŭ rejtynhu Biełaruskaj tenisnaj fiederacyi. U jakaści miesca jaje trenirovak tam paznačany Minsk.
Miarkujučy z publikacyj spartsmienki ŭ Instagram Stories, apošnija miesiacy jana ŭ asnoŭnym znachodziłasia ŭ Biełarusi. U minułyja vychodnyja Bartonie taksama pryniała ŭdzieł u adnym ź miascovych tenisnych turniraŭ. Pakul aficyjnaj zajavy ab źmienie spartyŭnaha pradstaŭnictva nie było.
Hienieralny sakratar Łatvijskaha tenisnaha sajuza Ivan Kuzavienkaŭ paviedamiŭ, što fiederacyja nie padtrymlivaje suviaź z tenisistkaj ź zimy i nie atrymlivała infarmacyi pra takoje rašeńnie.
Zaraz Kamiła Bartonie zajmaje 808‑ie miesca ŭ suśvietnym rejtynhu WTA. Na prafiesijnych turnirach jana nie vystupała ź siaredziny maja.