ES na vosień rychtuje «samy maštabny» pakiet sankcyj suprać Rasii
Jeŭrapiejski sajuz u najbližejšyja miesiacy płanuje pradstavić novy pakiet sankcyj suprać Rasii. Pavodle słoŭ viarchoŭnaj pradstaŭnicy ES pa zamiežnych spravach i palitycy biaśpieki Kai Kałas, jon moža stać samym maštabnym z pačatku poŭnamaštabnaj vajny Rasii suprać Ukrainy, paviedamlaje Die Welt.
Kaja Kałas. Fota: Beata Zawrzel / NurPhoto via Getty Images
Kałas zajaviła, što vosieńniu płanuje pradstavić najbolš šyroki sankcyjny śpis za ŭvieś čas vajny. Pavodle jaje, sankcyi ES užo kaštavali rasijskaj vajskovaj mašynie bolš za 1 tryljon jeŭra, abo kala 1,16 tryljona dalaraŭ.
Kali novyja abmiežavańni buduć pryniatyja, kolkaść rasijskich fizičnych asob, kampanij i arhanizacyj, jakija trapiać pad sankcyi, moža adrazu pavialičycca prykładna na tracinu.
Kałas padkreśliła, što sankcyjny cisk nieabchodna praciahvać uzmacniać da taho času, pakul Rasija nie spynić vajnu. Pry hetym jana nie raskryła kankretnych detalaŭ budučaha pakieta i nie nazvała dakładnych terminaŭ jaho pryniaćcia.
Raniej, 23 lipienia, krainy ES uzhadnili 21‑šy pakiet sankcyj suprać Rasii. Jon zakranuŭ finansavy i enierhietyčny siektary, rasijski vajskova-pramysłovy kompleks, a taksama praduhledžvaŭ uzmacnieńnie ekspartnaha kantrolu. U pryvatnaści, krainy ES praciahnuli na 12 miesiacaŭ dziejny ŭzrovień cenavaj stoli na rasijskuju naftu.
Sankcyjny cisk na Rasiju ŭzmacniajuć i ZŠA. U pačatku žniŭnia Sienat ZŠA ŭchvaliŭ zakonaprajekt, jaki daje prezidentu prava ŭvodzić myty suprać bujnych kupcoŭ rasijskaj nafty i pryrodnaha hazu, u tym liku Kitaja i Indyi. Ciapier dakumient pavinna razhledzieć Pałata pradstaŭnikoŭ ZŠA.