Akademija navuk rychtuje archieałahičnuju kartu Minska. Apošnija znachodki na Miency ŭnosiać značnyja karektyvy ŭ historyju horada
Da 960‑hodździa stalicy daśledčyki Instytuta historyi NAN Biełarusi rychtujuć maštabny prajekt — archieałahičnuju kartu Minska, jakaja abjadnaje vyniki šmathadovych daśledavańniaŭ.
Raskopki na Miency ŭ 2026 hodzie. Fota: pristalica.by
Adnačasova z hetym praciahvajucca raskopki na race Miency, dzie pieršapačatkova ŭźnik horad. Ich apošnija vyniki prymusili navukoŭcaŭ pierahledzieć niekatoryja staronki rańniaj historyi pasielišča.
Jak raskazaŭ telekanału STB zahadčyk adździeła archieałohii siarednich viakoŭ i novaha času Instytuta historyi Andrej Vajciachovič, padčas sioletniaha siezona na Małym haradziščy (dziadzincy — najbolš umacavanaj častcy, dzie žyła elita) u płaście pažaru XI stahodździa byli znojdzienyja ŭnikalnyja artefakty.
Siarod ich — abharełaja zbroja, nakaniečniki streł i dzidy, a taksama frahmienty draŭlanaha posudu. Draŭlanyja vyraby zmahli zachavacca da našych dzion vyklučna dziakujučy tamu, što asmalilisia padčas tahačasnaha pažaru.
Daśledavańni na Miency ŭnosiać važnyja karektyvy ŭ histaryčnyja kancepcyi. Pa-pieršaje, archieołahi znachodziać paćviardžeńni, što pieršyja abarončyja zbudavańni źjavilisia tut jašče ŭ kancy X stahodździa. Pa-druhoje, abviarhajecca teoryja pra chutki zaniapad pasielišča.
«Ličyłasia, što horad Miensk pierastaje funkcyjanavać naohuł u pieršaj pałovie XII stahodździa. Ale vyśvietliłasia, što na hetym małym haradziščy paśla pažaru žyćcio praciahvałasia», — adznačyŭ Andrej Vajciachovič.
Akramia taho, paviedamlajecca pra novyja znachodki ŭ halinie biełaruskaj padvodnaj archieałohii. U Biešankovickim rajonie z dna raki padniali elemienty staražytnych žytłaŭ, draŭlany posud i kaścianyja ŭpryhažeńni. Hetyja artefakty naležać da epochi poźniaha niealitu.