Aryna Sabalenka choča viasielle zhulać u Hrecyi
«Ja prosta chaču zładzić pa-sapraŭdnamu viasiołuju viečarynu, kab usie mahli vydatna pravieści čas i atrymać asałodu ad momantu».
Aryna Sabalenka i Hieorhias Franhulis. Fota: Vanessa Castillo/Getty Images
Biełaruskaja tenisistka, pieršaja rakietka śvietu Aryna Sabalenka raspaviała pra padrychtoŭku da viasiella z Hieorhijosam Franhulisam, adznačyŭšy, što ŭračystaść płanuje pravieści ŭ Hrecyi.
«Ja prosta zachoŭvaju roznyja rečy. U mianie jość papka dla viasiellaŭ u sacyjalnaj sietcy, i ja dadaju tudy natchnialnyja idei, jakija mnie padabajucca. Voś na jakim etapie my ciapier znachodzimsia. Hieorhijos (Franhulis, žanich Aryny Sabalenki) vielmi mudra pastupaje ŭ hetym płanie — jon dazvalaje mnie vyrašać, čaho ja chaču. Jość tolki niekalki rečaŭ, pra jakija jon kaža: «Dobra, voś heta abaviazkova pavinna być», a ja adkazvaju: «Tak, dobra, biez prablem».
Pakul my płanujem arhanizavać jaje ŭ Hrecyi. Ja prosta chaču zładzić pa-sapraŭdnamu viasiołuju viečarynu, kab usie mahli vydatna prabavić čas i atrymać asałodu ad momantu. Voś i ŭsio, i ja vielmi spadziajusia, što tak jano i budzie. Nie viedaju, ci dobraja heta ideja — vieści pramuju tranślacyju z Hrecyi, bo mnie zdajecca, što ja budu pić, dy i na stałach napeŭna budzie ałkahol. Samo saboj, tam budzie šmat «Marharyty», — skazała Sabalenka ŭ intervju Tennis Channel.
Raniej Aryna kazała, što paśla šlubu choča zachavać svajo proźvišča.
«U mianie budzie majo proźvišča. U mianie jość svaja historyja i, dziakuj bohu, mianie razumiejuć. Mnie chočacca proźvišča majho baćki ŭpisać u historyju», — kazała pieršaja rakietka śvietu.
Jaje tata Siarhiej Sabalenka pamior va ŭzroście 44 hadoŭ, kali dačce było 23 hady, i heta była trahiedyja.
«Ale kali ŭ nas kali-niebudź buduć dzieci, tam budzie baraćba. Ale ja ŭžo prajhraju ŭ hetaj bitvie, tak što dzieci, napeŭna, buduć Franhulisy», — kazała Aryna.
28‑hadovaja Sabalenka i 37‑hadovy brazilski pradprymalnik hreckaha pachodžańnia, zasnavalnik sietki Oakberry Hieorhijas Franhulis abviaścili pra zaručyny ŭ sakaviku.