Bolš za 3 tysiačy zamiežnikaŭ užo atrymali biełaruskija elektronnyja vizy

Z momantu zapusku servisu elektronnych viz u Biełaruś im skarystalisia bolš za 3 tysiačy zamiežnikaŭ. Pra heta paviedamili ŭ Nacyjanalnym centry elektronnych pasłuh.

Fota ilustracyjnaje

Zamiežnyja hramadzianie i asoby biez hramadzianstva mohuć ujazdžać u Biełaruś pa elektronnaj vizie. Adpaviednaja pasłuha dastupnaja na partale i ŭ mabilnym dadatku «Je-Pasłuha» z 20 sakavika 2025 hoda. Atrymać takuju vizu mohuć hramadzianie 67 krain, u tym liku ZŠA, Kanady, dziaržaŭ Jeŭrapiejskaha sajuza, Aŭstralii, Novaj Ziełandyi, Japonii i Vialikabrytanii.

Kab aformić elektronnuju vizu, nieabchodna stvaryć asabisty kabiniet na partale abo ŭ mabilnym dadatku. Zarehistravacca možna z dapamohaj elektronnaj pošty, numara telefona, a taksama akaŭntaŭ Google abo Apple. Paśla hetaha zajaŭnik zapaŭniaje i adpraŭlaje vizavuju ankietu.

Zajaŭka razhladajecca na praciahu siami kalandarnych dzion. Pry zapaŭnieńni ankiety nieabchodna paznačać poŭnyja i dakładnyja źviestki. Pamyłki ŭ asabistych danych mohuć stać pryčynaj admovy ŭ vydačy vizy i navat pryvieści da zabarony na ŭjezd u Biełaruś.

Infarmacyja pra pryniataje rašeńnie pastupaje ŭ asabisty kabiniet zajaŭnika.

Elektronnaja viza źjaŭlajecca adnarazovaj i moža vydavacca na termin da 30 sutak. Jana dazvalaje naviedać Biełaruś ź dziełavymi, turystyčnymi abo pryvatnymi metami, a taksama dla ŭdziełu ŭ spartyŭnych i navukovych mierapryjemstvach.

Pry ŭjeździe ŭ Biełaruś i padčas znachodžańnia ŭ krainie zamiežnik pavinien mieć mahčymaść prademanstravać elektronnuju vizu pa patrabavańni supracoŭnikaŭ kantrolnych orhanaŭ. Jaje možna pakazać na ekranie smartfona albo padać razdrukavanuju kopiju.

Kamientary da artykuła