U Minsku pjanaja školnica paškodziła ŭvachodnyja dźviery ŭ budynak
U Minsku 17‑hadovaja školnica ŭ stanie mocnaha ałkaholnaha apjanieńnia paškodziła ŭvachodnyja dźviery ŭ budynak. Ciapier joj vynieśli prysud, paviedamlaje ahienctva «Minsk-Naviny».
Fota ilustracyjnaje
Dziaŭčyna nie pryjšła načavać dadomu, a razam ź siabroŭkaj pajšła ŭ hości da znajomych, ź jakimi jany napiaredadni paznajomilisia ŭ internecie. Paźniej maci školnicy patelefanavali ź milicyi i paviedamili, što jaje dačka ŭčyniła chulihanstva. Praz mocnaje ałkaholnaje apjanieńnie dziaŭčynu dastavili ŭ taksikałahičnaje adździaleńnie balnicy.
Pavodle zapisaŭ kamier videanazirańnia, pozna ŭnačy školnica nie mienš za 28 razoŭ udaryła rukami i nahami pa ŭvachodnych dźviarach budynka na vulicy Ihara Łučanka. Akramia taho, jana vykarystoŭvała dla hetaha kavałak tratuarnaj plitki. U vyniku dźviery byli paškodžanyja, a ŭładalniku budynka nanieśli škodu na 553,93 rubla.
U dačynieńni da dziaŭčyny zaviali kryminalnuju spravu. U sudzie jana całkam pryznała vinu i raskajałasia ŭ zroblenym. Baćki školnicy kampiensavali naniesienuju škodu.
Dziaŭčyna raniej nie mieła sudzimaściaŭ i da kryminalnaj adkaznaści nie pryciahvałasia, ale ŭžo traplała ŭ pole zroku milicyi praz raśpićcio ałkaholu.
Sud pryznaŭ jaje vinavataj u chulihanstvie. Z ulikam niepaŭnaletniaha ŭzrostu zamiest pakarańnia da školnicy prymianili vychavaŭčuju mieru: na try miesiacy joj abmiežavali svabodu praviadzieńnia volnaha času. U hety pieryjad joj zabaroniena znachodzicca pa-za domam z 21:00 da 6:00.
Čytajcie taksama:
U Ivacevickim rajonie mužčyna dziela zabavy abstralaŭ ź pnieŭmatyki ravarysta
U Minsku pjany pasažyr napaŭ na taksista, bo toj nie razmaŭlaŭ ź im padčas pajezdki
Padletki zładzili fłet, pakul baćkoŭ nie było doma — skončyłasia kryminałkaj