Ukraina ŭdaryła pa naftavaj infrastruktury ŭ Jejsku

Ukrainskija vajskoŭcy nanieśli ŭdar pa marskim porcie ŭ Jejsku Krasnadarskaha kraja Rasii, paviedamiŭ Hienieralny štab USU.

Fota: t.me / exilenova_plus

U vyniku ataki byli paškodžanyja reziervuary z paliŭna-zmazačnymi materyjałami na naftava-naliŭnym kompleksie. Ukrainski bok śćviardžaje, što hety abjekt vykarystoŭvajecca dla zabieśpiačeńnia rasijskaj armii. Pamier naniesienaj škody pakul udakładniajecca.

Hubiernatar Krasnadarskaha kraja Vienijamin Kandraćjeŭ raniej paviedamiŭ pra ataku bieśpiłotnikaŭ na Jejski rajon. Pavodle jaho słoŭ, adzin z dronaŭ upaŭ u pryvatnym siektary, a jaho abłomki trapili na pradpryjemstva na terytoryi porta. Tam uźnik pažar, jaki na momant paviedamleńnia tušyli.

Taksama paviedamlałasia pra paciarpiełych siarod miascovych žycharoŭ. Pavodle zajavy Kandraćjeva, u vyniku ataki zahinuli dvoje dziaciej, jašče dvoje darosłych byli špitalizavanyja.

Jejski naftava-naliŭny kompleks uvachodzić u infrastrukturu marskoha porta Jejsk. Jon vykarystoŭvajecca dla pryjomu, zachoŭvańnia i pahruzki naftapraduktaŭ na marskija sudny.

Ahulnaja prapusknaja zdolnaść hruzavych terminałaŭ porta składaje kala 6,8 miljona ton hruzaŭ u hod. Bolš za miljon ton z hetaha abjomu prypadaje na naliŭnyja hruzy, u tym liku naftapradukty.

Kamientary da artykuła