U Minsku vystrailisia vialikija čerhi da basiejnaŭ FOTY

U Minsku apošnimi dniami ŭtvarylisia vialikija čerhi kala dvuch basiejnaŭ — «Družba» na vulicy Karalinskaj, 1, i basiejna siaredniaj škoły № 224 na vulicy Michaiła Ptašuka, 17. Fatahrafii ź vialikaj kolkaściu ludziej źjavilisia ŭ sacyjalnych sietkach, piša ahienctva «Minsk-Naviny».

Kala basiejna škoły № 224 ranicaj 24 žniŭnia vidavočcy naličyli bolš za 40 čałaviek. Žychary Łošycy paviedamlali, što i choł budynka byŭ pierapoŭnieny.

Vyśvietliłasia, što pryčynaj staŭ pačatak zapisu ŭ basiejn. Zapisacca žychary Łošycy mohuć da 31 žniŭnia, a ŭ pieršy dzień achvotnych akazałasia vielmi šmat.

U administracyi Leninskaha rajona paviedamili, što čarhu apieratyŭna absłuhoŭvali čatyry śpiecyjalisty, jakija prymali dakumienty. U budučyni płanujecca častkova pieravieści padaču zajavak u dystancyjny farmat, kab paźbiahać takich čerhaŭ.

Płatnyja zaniatki ŭ basiejnie pačnucca 1 vieraśnia 2026 hoda. Z ulikam vialikaj cikavaści žycharoŭ Łošycy płanujecca adkryć 42 dziciačyja i siem darosłych hrup. Zaniatki buduć pravodzić prafiesijnyja treniery-instruktary.

Padobnaja situacyja za niekalki dzion da taho ŭźnikła kala basiejna «Družba» ŭ Brylevičach. Z-za vialikaha popytu na abaniemienty ŭ dzień ich prodažu taksama ŭtvaryłasia značnaja čarha. Niekatoryja pabliki navat paviedamlali pra sutyčki pamiž ludźmi, jakija chacieli nabyć abaniemienty.

U administracyi Maskoŭskaha rajona paćvierdzili, što popyt na pasłuhi basiejna byŭ vysokim, tamu ŭ dzień prodažu ŭtvaryłasia vialikaja čarha. Dla bolš chutkaha absłuhoŭvańnia naviedvalnikaŭ dadatkova pryciahnuli supracoŭnikaŭ, ale abaniemienty pradavalisia ŭ paradku žyvoj čarhi.

Pry hetym ciapier u prodažy jašče jość svabodnyja miescy na azdaraŭlenčyja sieansy i ŭ hrupy pa navučańni płavańniu.

Z 1 vieraśnia ŭ basiejnie pačnuć pracavać hrupy pa navučańni płavańniu dla dziaciej i padletkaŭ, a taksama sieansy azdaraŭlenčaha płavańnia dla ŭsich achvotnych. Ustanovy paviedamlajuć pra daty i čas prodažu abaniemientaŭ, raskład zaniatkaŭ i inšuju nieabchodnuju infarmacyju na svaich sajtach i infarmacyjnych stendach.

Kamientary da artykuła