Kala Barysavaha kamienia ŭ Połacku śpiłavali staryja tapoli. Ciapier pierad Safijskim saboram pustka

Vierchni zamak pazbaviŭsia starych drevaŭ, jakija pryhoža abramlali staražytnyja pomniki. Pryčynaj dla znosu drevaŭ stali nastupstvy niadaŭniaj niepahadzi.

Placoŭka pierad Safijskim saboram mocna źmianiłasia paśla śpiłoŭvańnia starych drevaŭ. Fota: Facebook / Połack: minułaje i sučasnaść

Jak paviedamlaje krajaznaŭčaja supołka «Połack: minułaje i sučasnaść» u minułuju subotu ŭ horadzie byŭ mocny viecier, jaki złamaŭ vialikuju halinu na adnoj z tapolaŭ, što raźmieščany pobač z Barysavym kamieniem na Vierchnim zamku. U vyniku miascovyja słužby pryniali rašeńnie śpiłavać nie tolki paškodžanaje dreva, ale i susiedniuju tapolu.

Staryja drevy pryhoža abramlali pomniki daŭniny. Fota: belarus.travel

Staryja tapoli kala Barysava kamienia. Ciapier ich bolš niama. Fota: fotobel.by 

Pavodle śviedčańniaŭ vidavočcaŭ, druhaja tapola, jakaja znachodziłasia bližej da histaryčnaha vałuna, nie adrazu paddałasia śpiłoŭvańniu: padčas vałki stvała nie vytrymlivali i rvalisia viaroŭki. Sam Barysaŭ kamień padčas vałki dreŭ byŭ ščylna zahornuty ŭ čornuju plonku, jakaja, vidać, musiła zaścierahać jaho ad mahčymych paškodžańniaŭ, ale nie zusim jasna, jak jana mahła b heta zrabić. 

Śpiłoŭvańnie tapoli kala Barysava kamienia. Fota: Facebook / Połack: minułaje i sučasnaść

Źniknieńnie darosłych drevaŭ istotna źmianiła prastoru kala Barysava kamienia i Safijskaha sabora. Miascovyja žychary adznačajuć, što biez dreŭ hetaja častka zamka vizualna pieratvaryłasia ŭ pusteču.

Barysaŭ kamień paśla śpiłavańnia najbližejšych tapolaŭ. Fota: Facebook / Połack: minułaje i sučasnaść

Na fotazdymkach taksama možna zaŭvažyć aŭtavyšku ź lulkaj, padniataj da ŭzroŭniu karniza zachodniaha fasada Safijskaha sabora. Mahčyma, heta pačatak adboru ŭzoraŭ i fizika-chimičnych daśledavańniaŭ fasadaŭ pierad čakanaj maštabnaj restaŭracyjaj. 

Jak my paviedamlali raniej, na hetyja pracy vydzielena 2,4 miljona rubloŭ, a adbor uzoraŭ materyjałaŭ byŭ zapłanavany jakraz na červień—vierasień 2026 hoda. Hałoŭnaja intryha prajekta zaklučajecca ŭ mahčymym viartańni chramu sapraŭdnaha kalarovaha abličča siaredziny XVIII stahodździa: architektar-restaŭratar Raman Zabieła davodzić, što ciapierašni bieły koler źjaŭlajecca vynikam utylitarnych ramontaŭ časoŭ Rasijskaj impieryi, u toj čas jak aryhinalny baročny fasad mieŭ vochrystyja adcieńni z terakotavymi akcentami. 

Taksama novy prajekt moh by praduhledzieć bolš šyrokaje raskryćcio i abaronu (naprykład, šklanymi ekranami) unikalnaj muroŭki CHI stahodździa, jakaja siońnia pakazana tolki praź nievialikija łakalnyja zandažy, što pastupova rujnujucca pad uździejańniem klimatu.

Kamientary da artykuła