Na borcie «Biełavija» padčas rejsa ź Jehipta pamior pasažyr
Čartarny rejs «Biełavija» V2 8148, jaki lacieŭ z Šarm-el-Šejcha ŭ biełaruskuju stalicu, byŭ vymušany źmianić maršrut i zrabić pasadku ŭ Turcyi. Pryčynaj stała rezkaje paharšeńnie zdaroŭja adnaho z pasažyraŭ.
Zdymak ilustracyjny. Fota: Lookby.media
Uviečary 24 žniŭnia, u 23.30, čartarny rejs «Biełavija» V2 8148 Šarm-el-Šejch — Minsk ździejśniŭ pasadku ŭ aeraporcie Ankary (Turcyja) u suviazi z drennym samaadčuvańniem pasažyra.
Ekipaž prymaŭ na borcie miery dla akazańnia dapamohi, paviedamlaje avijakampanija. Bortpravadniki abviaścili pa hučnahavarycieli pra toje, što patrabujecca dapamoha miedycynskich rabotnikaŭ. Na zaklik adhuknulisia dva doktary. Pasažyru była praviedziena sardečna-lohačnaja reanimacyja.
Kamandzir pavietranaha sudna pryniaŭ rašeńnie pra vykanańnie ekstrannaj pasadki, kab apieratyŭna pieradać pasažyra miedykam.
Niahledziačy na ŭsie prykładzienyja namahańni, vyratavać žyćcio pasažyra nie ŭdałosia.
Paśla vykanańnia nieabchodnych pracedur i dazapraŭki samalot vylecieŭ z Ankary ŭ Minsk u 02.50 25 žniŭnia i ździejśniŭ pasadku ŭ Minsku ŭ 07.42.