Kolki kaštuje źniać žyllo dla studenta ŭ Minsku i inšych haradach

Napiaredadni novaha navučalnaha hoda ŭ Biełarusi prykmietna vyras popyt na arendu žylla dla studentaŭ. U žniŭni kolkaść abjektaŭ sa statusam «zdadziena» pavialičyłasia amal na 20% u paraŭnańni z anałahičnym pieryjadam minułaha hoda, piša Office Life.

Zdymak ilustracyjny. Fota: Lookby.media

Najbolš aktyŭna žyllo šukajuć u Minsku. Popyt pačaŭ raści jašče ŭ pačatku žniŭnia, a da siaredziny miesiaca tempy stali jašče bolšymi. Pry hetym najbolš istotna padaraželi asobnyja pakoi i adnapakajovyja kvatery.

U stalicy miedyjanny košt arendy žylla ŭ žniŭni znachodzicca prykładna ŭ miežach 1150—1188 rubloŭ na miesiac. Pakoj u siarednim kaštuje kala 450 rubloŭ, adnapakajovaja kvatera — kala 1100 rubloŭ, dvuchpakajovaja — prykładna 1320 rubloŭ. Za trochpakajovuju pryjdziecca płacić bolš za 1500 rubloŭ, a čatyrochpakajovaja kaštavaćmie amal 1800 rubloŭ.

Siarod abłasnych centraŭ najbolš darahaja arenda ciapier u Breście. Da kanca žniŭnia miedyjanny košt arendy tam vyras amal da 745 rubloŭ za miesiac. Pakoj možna znajści ŭ siarednim za 200 rubloŭ, adnapakajovuju kvateru — amal za 660 rubloŭ, dvuchpakajovuju — prykładna za 807 rubloŭ, trochpakajovuju — bolš čym za 870 rubloŭ, a čatyrochpakajovuju — kala 660 rubloŭ.

U Hrodnie miedyjanny košt arendy składaje 660—685 rubloŭ za miesiac. Pakoj u siarednim kaštuje 270 rubloŭ, adnapakajovaja kvatera — 600 rubloŭ, dvuchpakajovaja — kala 725 rubloŭ, trochpakajovaja — prykładna 930 rubloŭ.

U Homieli žyllo ŭ siarednim zdajuć za 600—615 rubloŭ za miesiac. Pakoj kaštuje kala 300 rubloŭ, adnapakajovaja kvatera — prykładna 590 rubloŭ, dvuchpakajovaja — krychu bolš za 730 rubloŭ, trochpakajovaja — kala 690 rubloŭ, a čatyrochpakajovaja — kala 900 rubloŭ.

U Viciebsku miedyjanny košt arendy ŭ žniŭni składaje kala 650 rubloŭ. Pakoj možna źniać prykładna za 190 rubloŭ, adnapakajovuju kvateru — za 650 rubloŭ, dvuchpakajovuju — za 750 rubloŭ, a trochpakajovuju — prykładna za 900 rubloŭ.

U Mahilovie siaredniaja arenda abychodzicca prykładna 600 rubloŭ za miesiac. Pakoj kaštuje kala 250 rubloŭ, adnapakajovaja kvatera — 600 rubloŭ, dvuchpakajovaja — 650 rubloŭ, trochpakajovaja — kala 700 rubloŭ.

Akramia abłasnych centraŭ, vysoki popyt nazirajecca ŭ Baranavičach, Pinsku i Połacku. Asabliva vyłučajucca Baranavičy: napiaredadni navučalnaha hoda arenda žylla tam padaražeła ažno na 43%, što stała samym vialikim rostam siarod papularnych u studentaŭ haradoŭ.

Śpiecyjalisty adznačajuć, što popyt na studenckaje žyllo praciahvaje raści pa miery nabližeńnia pačatku navučalnaha hoda. Tamu tym, chto šukaje kvateru abo pakoj, rajać zaniacca hetym zahadzia, kab paśpieć paraŭnać roznyja varyjanty, uličyć kamunalnyja płaciažy i pry nieabchodnaści razhledzieć supolnuju arendu ź inšymi studentami.

Kamientary da artykuła