«Jašče milimietr — i budzie popu bačna»: biełaruski znoŭ aburajucca dziciačymi kałhotkami Conte

Pytańniaŭ šmat: i da samich dziciačych kałhotak, jakija imitujuć pančochi, i da ich nazvy, i da seksualizavanych poz dziaŭčynak na ŭpakoŭcy.

Ksienija Viackaja, dyrektarka fiermierskaha rynka «Usio svajo» dy šmatdzietnaja maci, aburyłasia dziciačymi kałhotkami ajčynnaha vytvorcy Conte.

«Chto dazvalaje tak nazyvać dziavočyja kałhotki?» — napisała jana ŭ Threads i dałučyła da dopisu fotazdymki kałhotak, jakija imitujuć pančochi. Madeli nosiać nazvy «Sweet girl» (niekatoryja karystalniki pierakłali dasłoŭna — «sałodkaja dziaŭčynka», ale nasamreč vyraz aznačaje «miłaja dziaŭčynka») i «Lolita».

Darečy, apošniuju nazvu biełarusy ŭžo abmiarkoŭvali — šmat kaho aburyła asacyjacyja z tvoram Nabokava «Łalita». 

Dopis Ksienii Viackaj nabraŭ bolš za 1,2 miljona prahladaŭ, 25 tysiač łajkaŭ i 1,5 tysiačy kamientaroŭ. 

U žančyn uźnikła šmat pytańniaŭ nie tolki da nazvaŭ, ale i da samoj upakoŭki. Kałhotki, jakija sfatahrafavała Ksienija, pa pamiery padychodziać dla dziaŭčynki 3‑4 hadoŭ.

«Vybačajcie, heta kałhotki, jakija imitujuć pančochi? U dziaciej?».

Pry hetym, maleńkich madelej maksimalna imknulisia nablizić da darosłych žančyn. Adrazu kidajecca ŭ vočy darosły makijaž: «Nazva ŭ kamplekcie z takimi fota — heta p**iec. Čamu maleńkija dziaŭčynki pierastali vyhladać jak maleńkija dziaŭčynki? Čym zabitaja hałava ŭ markietołahaŭ i kreatyŭščykaŭ?».

Krytykujuć i pozy madelej. Najbolš papularny kamientar nabraŭ 17 tysiač łajkaŭ: «Usich zasmučaje nazva, ale tut dziaciej sprabujuć pakazać jak darosłych dziaŭčat».

Taksama pišuć: «Vidavočny makijaž ź blaskam na vusnach, poza darosłaj žančyny, seksualizavanyja nazvy — ja ŭ madelinhu 18 hadoŭ, šmat čaho bačyła i adčuvała na sabie, ale takoha ŭvohule nie čakała. Zdavałasia b, hetaja pdf-paviestka ŭžo paŭsiul — ale nie, praciahvajuć narmalizavać. Uklučajcie hałavu, darahija brendy. Dziaciej tak zdymać nie treba! Nie viedajecie jak — źviartajciesia, padkažu! Ale voś tak nie treba, kali łaska», «Dzieci pavinny zastavacca dziećmi, i dziciačyja madeli ŭ rekłamie dziciačych tavaraŭ taksama pavinny vyhladać jak dzieci, a nie jak «Łality»! Makijaž, darosłyja pozy, imitacyja pančoch, prypadniataja spadnička… Seksualizacyja dziaciej — heta padstava dla admieny, i mienavita pakupniki mohuć vykazać svoj pratest, ihnarujučy tavar z takim kantentam».

Kamientatarki dadali fotazadymki ŭpakovak inšych dziciačych kałhotak Conte. Na ich dziaŭčynki ŭ maksimalna karotkich sukienkach ci spadnicach siadziać tak, što nohi amal całkam aholenyja: «Fota na kałhotkach Mila — kryndž z kryndža. Tam jašče milimietr — i popa bačna. Navošta heta na dziciačych kałhotkach?». 

Varta adznačyć, što ŭ dyskusii chapaje i tych, chto nie pabačyŭ kramoły — maŭlaŭ, hetyja nazvy ŭ Conte isnujuć nie pieršy hod, dy i styl ich upakovak pryblizna taki i byŭ zaŭsiody. 

Sam ža vytvorca, akaŭnt jakoha nie adnojčy tehnuli z patrabavańniem prakamientavać situacyju, pakul ničoha nie adkazaŭ. 

Kamientary da artykuła