Roŭna hod tamu Viktoryja Azaranka praviała apošni matč u karjery
U rejtynhu Suśvietnaj žanočaj asacyjacyi, jaki budzie abnoŭleny paśla US Open-2026, jaje ŭžo nie budzie.
Toj samy matč. Fota: Yuki Iwamura / AP
29 žniŭnia 2025 hoda Viktoryja Azaranka zhulała apošni na hety momant matč u prafiesijnaj karjery. U trecim kruzie US Open biełaruska sastupiła Džesicy Piehule — 1:6, 5:7, piša «Sport Biełarusi».
Pry hetym u druhoj partyi Azaranka viała z brejkam — 4:2, ale ŭtrymać pieravahu nie zmahła. Tady paraza nie vyhladała prysudam: Piehuła paśla dajšła da paŭfinału US Open, a Azaranka akazała joj najbolšaje supraciŭleńnie siarod usich sapiernic na šlachu da matču, dzie taja sastupiła Arynie Sabalency.
Adnak paśla taho turniru Viktoryja bolš nie hulała. Jana prapuściła reštu siezona-2025 i ŭvieś hety adrezak siezona-2026. Aficyjna pra zaviaršeńnie karjery Azaranka nie abviaščała, ale ŭ rejtynhu WTA, jaki budzie abnoŭleny paśla US Open-2026, jaje ŭžo nie budzie. U jaho ŭvachodziać dziejnyja na praciahu hoda tenisistki. U sioletnim US Open biełaruska nie ŭdzielničaje.
I kali praz hady mienavita hety matč suprać Piehuły sapraŭdy buduć uspaminać jak apošni.
Viktoryi Azarancy 37 hadoŭ. Jana vyjhrała 21 turnir WTA (Suśvietnaj žanočaj asacyjacyi) u adzinočnym razradzie, dvojčy vyjhravała Australian Open (2012, 2013), trojčy hulała ŭ finale US Open, była čempijonkaj Alimpijady-2012 u mikście razam z Maksimam Mirnym, bronzavaj pryziorkaj hetych hulniaŭ u adzinočnym razradzie. U 2012 i 2013 hadach była pieršaj rakietkaj śvietu.