Japonskija krevietki zachapili deltu Dunaja i pačali vyciaśniać rakaŭ

U delcie Dunaja na poŭdni Rumynii imkliva raspaŭsiudžvajucca japonskija presnavodnyja krevietki. Hety vid trapiŭ u miascovyja vadajomy z rybnych haspadarak i za apošnija piać hadoŭ značna pavialičyŭ svaju kolkaść. Ciapier krevietki ŭžo vyciaśniajuć rakaŭ, a bijołahi nie vyklučajuć, što jany mohuć paŭpłyvać i na papulacyi ščupaka, sudaka dy akunia, piša vydańnie Observator.

Krevietki pachodziać z Azii. Pavodle adnoj ź viersij, jany spačatku trapili ŭ rybnyja haspadarki na Dniapry, a adtul praz deltu raspaŭsiudzilisia ŭ Dunaj i źviazanyja ź im aziory. Asabliva chutka jany razmnažajucca ŭ haračaje nadvorje.

Rybaki adznačajuć, što ŭ niekatorych miescach bierahi litaralna pierapoŭnienyja krevietkami. Pry hetym rakaŭ stała značna mienš: kali vada ciopłaja, pieravažajuć krevietki, a paśla pachaładańnia jany źnikajuć i znoŭ źjaŭlajucca raki.

Navukoŭcy pakul vyvučajuć upłyŭ novaha vidu na miascovuju ekasistemu. Jość aściarohi, što krevietki mohuć jeści ikru miascovych ryb i kankuravać ź inšymi vidami za ježu. Tamu ich užo razhladajuć jak patencyjna invazijny vid.

Tym časam presnavodnyja krevietki stanoviacca papularnymi i ŭ miascovych restaranach. U siale Sarykioj stravu ź ich možna nabyć prykładna za 4,4 dalara za 100 hramaŭ. Miascovyja ŭłady spadziajucca, što krevietki ŭdasca vykarystoŭvać jak novuju hastranamičnuju asablivaść rehijona, nie dapuskajučy surjoznaj škody dla inšych vidaŭ.

Kamientary da artykuła