U Daniecku padarvali aŭtamabil namieśnika načalnika Alenaŭskaj kałonii, dzie katavali ŭkrainskich pałonnych
U akupavanym Rasijaj Daniecku ŭzarvali aŭtamabil Dźmitryja Niajełava — pieršaha namieśnika načalnika Alenaŭskaj kałonii, jakoha va Ukrainie ličać datyčnym da katavańniaŭ ukrainskich vajennapałonnych, paviedamlaje «Ukrainskaja praŭda».
Skrynšot ź videa miesca zdareńnia
Pavodle infarmacyi ŭkrainskich ŚMI sa spasyłkaj na krynicy ŭ pravaachoŭnych orhanach, vybuch adbyŭsia ŭ noč na 29 žniŭnia. Papiarednie paviedamlajecca, što pad aŭtamabil zakłali vybuchovaje prystasavańnie. Pra stan Niajełava pakul ničoha nieviadoma.
U 2023 hodzie žurnalisty Kyiv Independent u dakumientalnym filmie «Kuratary zła» identyfikavali Niejełava jak adnaho ź ludziej, jakija mahli być datyčnyja da katavańniaŭ ukrainskich vajennapałonnych u Alenaŭcy.
U śniežni 2024 hoda ŭ Daniecku taksama ŭzarvali aŭtamabil byłoha načalnika Alenaŭskaj kałonii Siarhieja Jeŭsiukova. Jon, miarkujučy pa ŭsim, zahinuŭ.
Ukrainskija pravaachoŭniki zavočna paviedamili Jeŭsiukovu i Niejełavu pra padazreńnie ŭ žorstkim abychodžańni z vajennapałonnymi, spałučanym z naŭmysnym zabojstvam, učynienym hrupaj asobaŭ pa papiaredniaj zmovie. U lipieni 2026 hoda sankcyi suprać ich uvioŭ i Jeŭrapiejski sajuz.
29 lipienia 2022 hoda rasijski bok zajaŭlaŭ, što ŭkrainskija vajskoŭcy nibyta abstralali kałoniju ŭ Alenaŭcy, dzie ŭtrymlivalisia ŭkrainskija vajennapałonnyja, z reaktyŭnych sistem HIMARS. Adnak praz hod AAN adchiliła hetuju viersiju. Pavodle ekśpiertaŭ arhanizacyi, navat adna rakieta HIMARS vyklikała b značna bolš surjoznyja razbureńni.
Ukrainskaja raźviedka śćviardžała, što vybuch u kałonii arhanizavali najmity PVK «Vahnier» pa zahadzie jaje kiraŭnictva. Pavodle źviestak AAN, u vyniku trahiedyi zahinuli 53 ukrainskija vajennapałonnyja, jašče ad 75 da 130 čałaviek byli paranienyja.
Ukrainskaja prakuratura raspačała rasśledavańnie hetaj spravy. Paźniej Ukrainie pieradali cieły 62 zahinułych vajskoŭcaŭ, siarod jakich byli i achviary trahiedyi ŭ Alenaŭcy.
Čytajcie taksama:
Pad Jekaciarynburham padarvali mašynu dyrektara zavoda pa vytvorčaści dronaŭ. Jon u reanimacyi
Mašyna z rasijskimi čynoŭnikami padarvałasia na minie pad Kurskam