Źniščyŭ adzieńnie, vyliŭ šampuni, sapsavaŭ navat kropli dla vačej. Były kachanak nočču prabraŭsia ŭ kvateru biełaruski ŭ Batumi
Paśla ramana z rasijaninam Maryja Akulenka zastałasia ni z čym i prosić dapamohi.
Maryja Akulenka. Fota ź jaje Threads
Pra toje, jak historyja kachańnia z chłopcam-rasijaninam pieratvaryłasia ŭ film žachaŭ, biełaruska raskazała ŭ tredsach.
Niekalki miesiacaŭ tamu Maryja skončyła adnosiny z kavaleram. Praŭda, toj nie viarnuŭ klučy ad jaje kvatery. Maładaja žančyna dapuściła fatalnuju pamyłku — jana nie stała mianiać zamki.
Spadziavałasia na sumlennaść byłoha kachanaha. Była ŭpeŭniena, što darosły čałaviek nikoli nie pryjdzie biez zaprašeńnia ŭ čužuju kvateru. I darma.
«Pakul ja spakojna pracavała ŭ načnuju źmienu, jon pryjšoŭ u kvateru i źniščyŭ UVIEŚ moj harderob: adzieńnie, bializnu, škarpetki, abutak, vopratku. Toje, što nie zmoh źniščyć, kłapatliva abliŭ jodam».
Žadajučy adpomścić, były kachany pavylivaŭ šampuń i balzam dla vałasoŭ, a taksama takija dziavočyja radaści jak parfumu dy roznyja toniki dla tvaru. Nie paškadavaŭ navat kropli dla vačej, jakija Maryja niadaŭna pryviezła ź Biełarusi z raźlikam, kab chapiła na hod.
U hetaj niaroŭnaj baraćbie zahinuła i bytavaja chimija — mužčyna vyliŭ usio.
Biełaruska kaža, što było b nie tak kryŭdna, kali były kachany źniščyŭ niešta z taho, što sam niekali nabyŭ ci padaryŭ — ale nie.
U Maryi jość dačka — na ščaście, dziciačyja rečy zastalisia niepaškodžanymi.
Žančyna źviarnułasia pa dapamohu, bo kaža, što zastałosia ŭ jaje cełym tolki toje, što było adzieta na žančynie. I dadaje, što vyrašyła ahučyć situacyju, kab čałaviek razumieŭ: jana nie budzie maŭčać.
Mienš čym za dzień dopis nabraŭ kala 100 tysiač prahladaŭ i sotni kamientaroŭ z prapanovaj dapamohi. Adny hatovyja byli padzialicca svaim adzieńniem, inšyja paviedamlali, što chutka pajeduć u Turcyju na zakupy i mohuć pryvieźci niešta z bytavoj chimii. Prapanoŭvali i zabrać Maryju na niekalki dzion na adpačynak, kab dapamahčy adyści ad takoj situacyi.
Znajšlisia achvotnyja padtrymać hrašyma — z samych roznych krain. Źjavilisia ŭ kamientarach kramy, jakija prapanavali Maryi zavitać da ich i vybrać biaspłatna niešta ź ich asartymientu.
A biełaruska narešcie vyklikała majstra, kab zamianić zamki.