«Šachiedy», jakija laciać na Kijeŭ, mohuć praciahvać vykarystoŭvać dla navihacyi biełaruskija stancyi mabilnaj suviazi
Drony maksimalna doŭha trymajucca ŭzdoŭž miažy ź Biełaruśsiu.
Fota: AP Photo Efrem Lukatsky, File
Pazaštatny daradca prezidenta Ukrainy pa pytańniach raźvićcia technałahičnych kirunkaŭ abarony Siarhiej «Fłeš» Biaskrestnaŭ kaža, što sotni reaktyŭnych dronaŭ «Šachied» abychodziać pramy šlach u Kijeŭ i maksimalna doŭha trymajucca la miažy Biełarusi dziaržavy. Asnoŭnaje tłumačeńnie — pryviazka abstalavańnia bieśpiłotnikaŭ da biełaruskaj hramadzianskaj infrastruktury suviazi, paviedamlaje RBK-Ukraina.
«Ja spyniŭsia na tym, što LTE-mademy na «Šachiedach» pry takim maršrucie palotu pracujuć z bazavymi stancyjami mabilnaj suviazi Biełarusi», — adznačyŭ Siarhiej «Fłeš».
Jon dadaŭ, što viersija pra pramoje kiravańnie praź biełaruskija punkty MESH małaimaviernaja, bo «punkty suviazi pracujuć značna dalej, čym da miažy».
«Šachiedy» atakujuć Kijeŭ pa adnym maršrucie. Karcinka: Serhii.Flash / Facebook
Jak raniej paviedamlali ŭ Centry procidziejańnia dezinfarmacyi, Rasija zapuskaje na Kijeŭ reaktyŭnyja drony chvalami. Hałoŭnaja meta takoj taktyki voraha — vysnažyć sistemu SPA i pastajannymi tryvohami paralizavać žyćciadziejnaść stalicy.
Akramia hetaha, za apošnija tydni kolkaść reaktyŭnych «Šachiedaŭ», jakija RF zapuskaje pa Ukrainie za miesiac, rezka vyrasła. Rasija zapuskaje pa Ukrainie reaktyŭnyja drony praktyčna adrazu z kanviejera, navat biez praciahłaha zachoŭvańnia na składach.