Apublikavany novy hienieralny płan Homiela. Što ŭ im?

Novy hienieralny płan Homiela raźličany da 2035 hoda. Telehram-kanał «Žiliŝnyj vopros | Homiel» vydzieliŭ z abjomnaha dakumienta samyja istotnyja momanty.

Homiel. Fota ilustracyjnaje

Adnym z asnoŭnych napramkaŭ žyllovaha budaŭnictva ŭ Homieli stanie mikrarajon Navabielica. Novyja šmatpaviarchovyja damy płanujuć budavać na miescy byłoj vajskovaj čaści na vulicy Dobrušskaj, u rajonie vulicy Łunačarskaha i Uschodniaha abjezdu, a taksama ŭ novych mikrarajonach Biarozki i Hałavincy.

Vialikaja ŭvaha nadajecca raźvićciu Uschodniaha abjezdu. Płanujecca jaho praciah, budaŭnictva novaha mosta praz Sož, puciepravodaŭ i transpartnych raźviazak. Biez hetaj infrastruktury paŭnavartasna źviazać novyja terytoryi za Sožam z astatniaj častkaj horada budzie składana.

Niekatoryja pramysłovyja zony ŭ miežach Homiela chočuć pieraŭtvaryć i vykarystoŭvać dla inšych patreb. Siarod ich — terytoryi šviejnaha pradpryjemstva «8 Sakavika», «Kaminterna», chlebazavoda №2, «Farmacyi», «Homielhandalaŭtatransa» i inšych vytvorčych i składskich abjektaŭ. Novyja pradpryjemstvy prapanujecca raźmiaščać bližej da ŭskrain horada — u rajonie chimzavoda, Abjaznoj, Fiadziuninskaha i Dobrušskaj.

U pierśpiektyvie hruzavyja apieracyi račnoha porta mohuć pieranieści nižej pa Sožy, u rajon Asaŭcoŭ. Za ciapierašnim portam płanujuć pakinuć pasažyrskuju funkcyju.

Pavodle raźlikaŭ, płošča ahulnadastupnych azielanionych terytoryj pavinna pavialičycca prykładna z 991 da 2695 hiektaraŭ. Adnak značnaja častka hetaha rostu źviazana z uklučeńniem u haradskuju miažu ŭžo najaŭnych lasoŭ i pryrodnych terytoryj, a nie tolki sa stvareńniem novych parkaŭ. Pry hetym novyja parki i skviery taksama praduhledžanyja.

Asabliva varta źviarnuć uvahu ŭładalnikam pryvatnych damoŭ uzdoŭž bujnych mahistralaŭ. Kala vulic Savieckaj, Iljiča, Barykina, Bahdana Chmialnickaha, Krupskaj, Rečyckaha praśpiekta i praśpiekta Kasmanaŭtaŭ płanujuć stvaryć 100‑mietrovyja zony z «vysokim horadabudaŭničym patencyjałam». Tam praduhledžvajecca rekanstrukcyja i pastupovaja zamiena najaŭnaj zabudovy. Faktyčna heta aznačaje, što častka pryvatnaha siektara moža z časam źniknuć.

Hienpłan taksama praduhledžvaje likvidacyju niekatorych boksavych haražoŭ i stvareńnie zamiest ich arhanizavanych mašyna-miescaŭ. Adnak pakul niezrazumieła, nakolki realna buduć realizavanyja płany šmatuzroŭnievych parkinhaŭ, jakija ŭ Homieli ŭžo nie raz praduhledžvalisia raniej.

Asobna ŭ dakumiencie razhladajecca prablema transpartnaha šumu. Uzdoŭž šerahu bujnych vulic i praśpiektaŭ płanujuć pastavić šumazaścierahalnyja kanstrukcyi i stvarać achoŭnyja zialonyja nasadžeńni.

Kamientary da artykuła