Pucin rezka źmianiŭ rytoryku: Damovicca pamiž saboj pavinny mienavita Rasija i Ukraina
Raniej prezident Rasii nie bačyŭ va Ukrainie samastojnaha pieramoŭščyka i ličyŭ, što damaŭlacca treba z ZŠA.
Damovicca pamiž saboj pavinny mienavita RF i Ukraina, a inšyja krainy mohuć tolki padtrymać i dapamahčy. Pra heta zajaviŭ prezident RF Uładzimir Pucin na plenarnaj siesii Uschodniaha ekanamičnaha forumu.
«Damovicca pamiž saboj pavinny pierš za ŭsio Rasija i Ukraina. A ŭsie astatnija krainy hatovyja padtrymać i dapamahčy. I nie tolki Złučanyja Štaty, ale i krainy, jakija tut prysutničajuć», — skazaŭ Pucin.
Pavodle jaho słoŭ, naprykład, Kitajskaja Narodnaja Respublika pastajanna źviartaje na heta ŭvahu i ŭsialak spryjaje tamu, kab prablema była vyrašanaja, pierš za ŭsio mirnymi srodkami. «Staršynia Si Czińpin, kali my ź im sustrakajemsia, taksama pastajanna ŭzdymaje hetaje pytańnie», — raskazaŭ rasijski lidar.
Pucin miarkuje, što jość šaniec na ŭrehulavańnie va Ukrainie.
«Ci jość šancy? Tak, na moj pohlad, jany jość», — zajaviŭ jon.
Pavodle jaho słoŭ, kantakty z Ukrainaj pa linii śpiecsłužbaŭ praciahvajucca.
Ciapierašniaja zajava Pucina pra toje, što damaŭlacca pavinny najpierš Rasija i Ukraina, kantrastuje z raniejšaj rytorykaj. Pucin nieadnarazova nazyvaŭ ukrainskaje kiraŭnictva «nielehitymnym» i «terarystami», zajaŭlaŭ, što nie bačyć sensu ŭ sustrečy z Uładzimiram Zialenskim, a hałoŭnym pieramoŭnym partnioram Maskvy ličyŭ ZŠA. Jašče niekalki dzion tamu Pucin kazaŭ, što ź ciapierašnimi ŭładami Ukrainy Rasija pieramoŭ vieści nie budzie.