Načnaja ataka na Sočy: atakavany kompleks SPA, haryć naftabaza
U noč na 4 vieraśnia Sočy, Adler i fiederalnuju terytoryju Siryus atakavali bieśpiłotniki. Rasijskija ŭłady paćvierdzili pažar na naftabazie i paškodžańni žyłych damoŭ. OSINT-analityki miarkujuć, što jašče adnoj cellu byŭ rasijski dyvizijon supraćpavietranaj abarony.
Žychary Sočy paviedamlali nočču pra šmatlikija vybuchi, paśla jakich u niekalkich miescach uźnikli pažary. Vysoki słup połymia nad naftabazaj byŭ bačny za niekalki kiłamietraŭ.
«Paškodžana škleńnie ŭ niekalkich žyłych damach i budynkach, u asobnych vypadkach uźnikli ŭzharańni, jakija apieratyŭna patušyli. Taksama adbyłosia ŭzharańnie na terytoryi naftabazy», — paviedamiŭ apieratyŭny štab Krasnadarskaha kraju.
Asobny pažar uźnik kala pasiołka Siryus na miažy z Abchazijaj. Vydańnie ASTRA praanalizavała videa vidavočcaŭ i vyznačyła, što ŭ hetym miescy znachodzicca pazicyja rasijskaha zienitna-rakietnaha kompleksu S-300 abo S-400.
Manitorynhavyja kanały paviedamlali pra druhasnuju detanacyju paśla ŭdaru, adnak niezaležnaha paćviardžeńnia źniščeńnia abo paškodžańnia kompleksu pakul niama.