Biznesmien z Hrodna ŭziaŭ šefstva nad zubrami ź Biełaviežskaj puščy
U Biełaviežskaj puščy źjaviŭsia pieršy aficyjny apiakun zubroŭ. Im staŭ hrodzienski biznesmien Andrej Biertel, uładalnik viełasipiednaj fabryki Racer. U minułyja vychadnyja jon pryjechaŭ znajomicca sa svaimi padapiečnymi — i, zdajecca, zubram heta spadabałasia. Prynamsi, morkvu i jabłyki jany biez saramlivaści zabirali z ruk, piša «Točka».
Fota: Racer
Jak heta było
Razam ź Biertelem u pušču pryjechali 18 viełasipiedystaŭ — jany śpiecyjalna pieranieśli treniroŭku, kab ubačyć zubroŭ.
Zubry śmieła padychodzili da aharodžy i zabirali harodninu praz adtuliny ŭ sietcy. U pieršuju čarhu razyšłasia morkva, jaje jany lubiać bolš za ŭsio.
Fota: Racer
Samy bujny ŭ valjery — samiec Bora. Jon akuratna zabiraŭ pačastunak, hłytaŭ całkam i tut ža prasiŭ dabaŭki. Maleńkaje ciala, jakoje naradziłasia sioleta, taksama śmieła stajała kala sietki i zusim nie bajałasia ludziej.
«My viedajem, što lubimy pačastunak zubroŭ — heta jabłyki, morkva, kapusta. Tamu ŭziali taki nabor harodniny. Dla pieršaha znajomstva navat skłali z kačanoŭ śviežaj kapusty i morkvy niešta padobnaje da torta dla zubroŭ, ale potym zrazumieli, što hetaja estetyka tut nie patrebnaja», — raskazvaje Biertel.
Namieśnik hienieralnaha dyrektara Nacyjanalnaha parku «Biełaviežskaja pušča» Maksim Prychadoŭski (źleva) i dyrektar TAA «MTB-hrup» Andrej Biertel. Fota: Racer
Čamu biznesmien vyrašyŭ apiekavać zubroŭ
Pavodle słoŭ Biertela, ideja naradziłasia vypadkova. Vyjava zubra na karobkach viełasipiedaŭ źjaviłasia zadoŭha da dabračynnaj prahramy — nie jak łahatyp, a jak vobraz, jaki adlustroŭvaje sutnaść praduktu.
«My daŭno adčuvali suviaź z hetymi žyviołami — jany pra moc, nadziejnaść, siłu, vynoślivaść. Kali my vypuścili sieryju viełasipiedaŭ, pryśviečanuju pryrodzie, uźnikła ideja dabračynnaj prahramy», — kaža biznesmien.
Fota: Racer
Kali vypuścili sieryju viełasipiedaŭ, pryśviečanuju pryrodzie, u kampanii vyrašyli pajści dalej. Častku srodkaŭ ad prodažu limitavanych madelaŭ nakiroŭvajuć u nacyjanalny park na zakupku karmoŭ dla maładniaku.
Jak adznačyŭ namieśnik hiendyrektara nacparku Maksim Prychadoŭski, «inicyjatyva «Moc pryrody» važnaja nie stolki abjomami pieradadzienaha kormu, kolki samoj idejaj. Jana pakazvaje, što biznes moža być nieabyjakavym i bačyć u pryrodzie nie resurs, a partniora».
Što dalej
Na 2026 hod u biełaruskaj častcy Biełaviežskaj puščy žyvie kala 800 zubroŭ. Uzimku, kali kormu stanovicca mienš, jany majuć patrebu ŭ padkormcy. U kožnym laśnictvie abstalavanyja śpiecyjalnyja placoŭki, kudy z nadychodam chaładoŭ prychodziać statki.
Minułaja zima była surovaj, ale, pavodle słoŭ jehieraŭ, prajšła biez strat. Kolkaść papulacyi raście — sioleta častku zubroŭ pieradali ŭ Rasiju ŭ ramkach prahramy raśsialeńnia.
Administracyja parku spadziajecca, što za prykładam Biertela pajduć i inšyja kampanii.