Načalnikam «Voŭčych noraŭ» pryznačyli aficera z kałonii ŭ Navasadach
Dźmitryj Nieściarovič raniej kuryravaŭ dystancyjnyja bahasłoŭskija kursy dla źniavolenych i antynarkatyčnyja strymy dla školnikaŭ. Ciapier jon uznačaliŭ kałoniju, viadomuju ciskam na palitviaźniaŭ.
Z 1 vieraśnia načalnikam papraŭčaj kałonii №22 u Ivacevickim rajonie staŭ Dźmitryj Nieściarovič, paviedamlaje Mayday.Team.
Da hetaha padpałkoŭnik unutranaj słužby pracavaŭ namieśnikam načalnika pa papraŭčym pracesie ŭ kałonii №14 strohaha režymu ŭ vioscy Navasady Barysaŭskaha rajona.
Tam Nieściarovič kuryravaŭ dystancyjnyja bahasłoŭskija kursy, a taksama videasuviaź pamiž źniavolenymi i ich dziećmi: asudžanyja čytali im knihi. Jon arhanizoŭvaŭ i strymy dla školnikaŭ, padčas jakich asudžanyja za narkazłačynstvy raskazvali pra nastupstvy ŭžyvańnia narkotykaŭ.
Papiaredni načalnik «Voŭčych noraŭ» Viktar Śviryd u lipieni syšoŭ na piensiju paśla dasiahnieńnia 50 hadoŭ. Časova kałonijaj kiravaŭ jaho namieśnik Alaksandr Šelest, adnak na pasadzie jaho nie zaćvierdzili.
Kałonija №22 raźmiaščajecca prykładna za 20 kiłamietraŭ ad Ivacevičaŭ na terytoryi byłoj savieckaj vajskovaj častki. U studzieni pravaabaroncy paviedamlali, što tam utrymlivali nie mienš za 59 palitviaźniaŭ, a taksama, što na palityčnych uzmacnili cisk.