Ukraincy stali vyjazdžać z Polščy
Pakul ličby nie vielmi značnyja. U lipieni kolkaść hramadzian Ukrainy, jakija majuć status časovaj abarony ŭ Polščy, źmienšyłasia na 8,11 tys. i składaje 953,1 tys.
Ilustracyjnaje fota viasny 2022 hoda AP
Novyja danyja Jeŭrastata vyrazna śviedčać pra toje, što častka ŭkrainskich vajennych biežancaŭ apošnim časam pakidaje Polšču, piša UNIAN sa spasyłkaj na RMF24.
Tolki ŭ lipieni kolkaść hramadzian Ukrainy, jakija majuć status časovaj abarony ŭ Polščy, źmienšyłasia na 8,11 tys. i składaje 953,1 tys. U červieni ž krainu pakinuli 6,3 tys. hramadzian Ukrainy, jakija karystajucca časovaj abaronaj ES.
U svaju čarhu, u Hiermanii ŭ červieni znachodziłasia amal 1,29 młn čałaviek, jakija karystajucca abaronaj. U Čechii ž na kaniec červienia ich było kala 381 tys. čałaviek. Mienavita Čechija ŭsio čaściej stanovicca vybaram ukrainskich biežancaŭ, jakija vyrašajuć źjechać z Polščy.
Prykmietna, što vysokija pakazčyki ŭ spravazdačy za lipień taksama zafiksavanyja ŭ Ispanii (272,3 tys.), Rumynii (219,4 tys.) i Słavakii (149,0 tys.).
Hetyja źviestki pachodziać z apublikavanaha abnaŭleńnia bazy danych Jeŭrastata ab asobach, jakija karystajucca časovaj abaronaj, uviedzienaj u Jeŭrapiejskim sajuzie paśla rasijskaj ahresii suprać Ukrainy, jakaja pačałasia ŭ lutym 2022 hoda.