U Hrodnie sioleta nabrali dva biełaruskamoŭnyja kłasy dla 16‑ci dziaciej

U novym navučalnym hodzie ŭ Hrodnie znoŭ adkrylisia kłasy ź biełaruskaj movaj navučańnia. Adzin ź ich pačaŭ pracu ŭ siaredniaj škole №34, dzie baćki mohuć jašče zapisać svajo dzicia ŭ pieršy kłas, paviedamlaje «Hrodzienskaja praŭda».

Fota: «Hrodzienskaja praŭda»

U hetym hodzie ŭ biełaruskamoŭny pieršy kłas škoły №34 užo zaličyli piać dziaciej. Usie asnoŭnyja pradmiety jany buduć vyvučać pa-biełarusku — ad pačatkovych urokaŭ da inšych dyscyplin. Škoła całkam zabiaśpiečvaje vučniaŭ nieabchodnymi padručnikami i vučebnymi dapamožnikami.

Dla samoj škoły takaja forma navučańnia nie novaja. U minułym navučalnym hodzie tut užo dziejničaŭ biełaruskamoŭny kłas dla dzieviacikłaśnikaŭ, u jakim vučylisia vosiem dziaciej. Piedahohi adznačajuć, što vykładańnie asnoŭnych pradmietaŭ, asabliva ŭ pačatkovych kłasach, viadziecca całkam na biełaruskaj movie.

Niekatoryja zaniatki, naprykład fizkulturu, dzieci naviedvajuć razam z vučniami inšych paralelnych kłasaŭ. Heta robicca dla taho, kab na spartyŭnych zaniatkach była dastatkova vialikaja hrupa i ich možna było pravodzić bolš cikava i paŭnavartasna.

Pierad pačatkam navučalnaha hoda škoła praviała pracu z baćkami, kab dapamahčy im vyznačycca z movaj navučańnia dla svaich dziaciej. Na adnym z baćkoŭskich schodaŭ vystupiła maci, dzicia jakoj užo paśpiachova vučycca pa-biełarusku. Jana raskazała pra ŭłasny stanoŭčy dośvied i padkreśliła važnaść biełaruskamoŭnaha asiarodździa dla dziciaci.

Sioleta pieršakłaśnikaŭ budzie vučyć daśviedčanaja nastaŭnica Alena Sierak. Akramia zvyčajnych urokaŭ, jana arhanizoŭvaje pazakłasnyja mierapryjemstvy, pryśviečanyja biełaruskaj kultury i tradycyjam.

U novym navučalnym hodzie taki kłas nabrali taksama ŭ siaredniaj škole №32 imia Łaryjonavaj. Tam za party pavinny sieści 11 pieršakłaśnikaŭ.

Kamientary da artykuła