Dva aŭtobusy biełarusaŭ pavieźli ŭ Maskvu na chresny chod z moščami Danskoha na čale z patryjarcham Kiryłam
Molacca za pieramohu ŭ vajnie suprać Ukrainy. Telekanał RPC nazvaŭ śviatyniu znakam niepaźbiežnaj pieramohi Rasii.
Na chresny chod na čale z patryjarcham Kiryłam arhanizavana pryvieźli viernikaŭ ź Biełarusi. Jak paviedamlaje telehram-kanał «Pravasłaŭje i zombi», paśla adpaviednaha lista ŭ Minsku sabrali prynamsi dva aŭtobusy — kala 100 čałaviek. U Maskvu taksama nakiravali navučencaŭ Minskaj duchoŭnaj sieminaryi i akademii.
Hałoŭnaj śviatyniaj šeścia staŭ kaŭčeh z moščami maskoŭskaha kniazia Dźmitryja Danskoha. Minabarony Rasii paviedamlała, što kaŭčeh vyrabili pa błasłavieńni patryjarcha Kiryła, kab vazić pa vajskovych častkach rasijskaj armii, u tym liku na vajnu suprać Ukrainy. U viedamstvie nazvali heta «dla našaha suciašeńnia i našaj pieramohi».
U efiry pravasłaŭnaha telekanała «Spas» śviatar Valeryj Duchanin zajaviŭ, što Dźmitryj Danski ciapier «dapamahaje ŭ supraćstajańni ź niepryjacielem»: «Nam budzie dadzienaja pieramoha ŭ tych bajavych dziejańniach, jakija ciapier viaducca, i Rasija niesumnienna pieramoža. Tamu i javilisia moščy kniazia jak znak taho, što Haspodź znoŭ pobač z nami».
Havoračy pra histaryčnych vorahaŭ kniazia, śviatar zhadaŭ nie tolki manhoła-tatar, ale i Litvu, nazvaŭšy jaje «simvałam zachodniaj cyvilizacyi, jakaja supraćstaić».
Naprykancy žniŭnia RPC abviaściła pra cud i «druhoje zdabyćcio» moščaŭ Dźmitryja Danskoha, chacia miesca jaho pachavańnia ŭ Archanhielskim sabory Maskoŭskaha Kramla było viadoma raniej i nikudy nie źnikała.